Лукашэнка падпісаў указ аб садаводчых таварыствах
Прэс-служба Лукашэнку паведаміла, што ён падпісаў указ № 155 «Аб садаводчых таварыствах». Дакумент, як сцвярджаецца, накіраваны «на ліквідацыю назапашаных з улікам практыкі дзейнасці садаводчых таварыстваў прабелаў і супярэчнасцяў у заканадаўстве і спрашчэнне вырашэння многіх пытанняў».
31.05.2023 / 16:12
Фота ілюстрацыйнае
У прыватнасці, дакументам вызначаны парадак прыняцця членамі таварыства рашэння аб уключэнні яго тэрыторыі ў рысу населенага пункта або ўтварэння новага населенага пункта на яго аснове.
Таксама ўказам уводзіцца магчымасць перадачы на баланс дзяржаўных энергазабяспечвальных арганізацый высакавольтных электрасетак таварыстваў. Праз гэта члены таварыстваў змогуць прымяняць тарыф на спажываную электраэнергію як для жыллёвага фонду.
Акрамя таго, указам змененыя падыходы да фарміравання памераў членскіх унёскаў. Наяўныя нормы аб іх спагнанні без залежнасці ад памераў зямельных участкаў скарэктаваныя, і цяпер таварыствы змогуць прымаць рашэнні па гэтых пытаннях самастойна.
Таксама мясцовым уладам далі права самі прызначаць старшыню праўлення таварыства ў выпадку яго працяглай адсутнасці.
Чытайце таксама:
Колькі цяпер у Беларусі пустых хат?
Ці можна вывесці дачу ў індывідуальную жыллёвую забудову і як не памыліцца з выбарам лецішча
Урад вызначыў спіс паселішчаў і садовых таварыстваў, дзе нельга будзе купіць участак зямлі