У Мінску работніца салона прыгажосці збегла ад работнікаў падатковай праз акно
Добра, што салон знаходзіцца на першым паверсе.
02.06.2023 / 13:21
«Учора падчас праверкі салона прыгажосці адна работніца сферы паслуг так перахвалявалася, што пакінула сваё працоўнае месца праз акно. Балазе, што ўстанова размешчана на першым паверсе», — распавялі Tochka.by ў падатковай.
Аказалася, што ў салоне аказвалі медыцынскія паслугі без дазволу на тое Міністэрства аховы здароўя — рабілі лазерную эпіляцыю.
«Паважаныя бізнэсоўцы, мы разумеем, што салон прыгажосці без пакета медыцынскіх паслуг — гэта як рэстаран без віннай карты, але, прымаючы рашэнне аб аказанні медыцынскіх паслуг, не палічыце за працу звярнуцца ў Міністэрства аховы здароўя па адпаведны дазвол», — нагадалі ў падатковай інспекцыі.
Днямі ўпраўленне аператыўных мерапрыемстваў інспекцыі МПЗ па Мінску зазірнула і ў іншыя салоны прыгажосці. І знайшлі там адно з самых частых парушэнняў — утойванне наяўнай выручкі. Цяпер трэба будзе выявіць кола ўцягнутых асоб.