«Uziali staryja tablicy CT». Jak pieraličyli bały na CE, choć heta i zabaroniena zakanadaŭstvam
RIKV siońnia pieraličyŭ vyniki centralizavanaha ekzamiena, jak śćviardžajecca, pa novaj raspracavanaj mietodycy (choć raniej u Minadukacyi zajaŭlali, što pa zakonie vyniki pieraličyć nielha, tamu ničoha mianiacca nie budzie). Pry hetym novaja mietodyka, zdajecca, zaklučajecca ŭ pavieličeńni pieršaha vyniku na 10—15 bałaŭ i supadaje ź mietadam padliku na RT. «Lusterka» daviedałasia detali ŭ vypusknikoŭ.
02.06.2023 / 17:07
Fota: Minskaja praŭda
Vypusknica minskaj škoły Vieranika [heta i nastupnyja imiony źmienieny — NN] zdavała CE pa biełaruskaj movie. Pieršapačatkova jana atrymała 78 bałaŭ, dapuściŭšy dźvie pamyłki, a siońnia ŭbačyła ŭ asabistym kabiniecie zapavietnyja 90. Praz tydzień vyniki ekzamienu pieraličyli pa toj ža sistemie, jakaja była na RT. «Jak i pavinna być!» — ščaśliva kamientuje dziaŭčyna.
Hetak ža źmianiŭsia bał Ivana z Bresta: za adnu pamyłku i dva niapoŭnyja adkazy ŭ teście pa biełaruskaj movie jon pieršapačatkova atrymaŭ 78 bałaŭ, jakija siońnia pieratvarylisia ŭ 90.
A voś u adzinaccacikłaśnicy ź Viciebska Iryny vynik vyras na 10: zamiest pieršapačatkovych 86 bałaŭ za CE pa ruskaj u sistemie ciapier 96. U Jarasłava z Rečycy anałahičny plus: ciapier u jaho 92 bały za ekzamien pa ruskaj movie.
Jašče adna čytačka, Hanna ź Viciebska, vyjaviła dadatkovyja 14 bałaŭ da svajho vyniku: zamiest 75 pa ruskaj movie ŭ jaje 89 bałaŭ. «Na što ja i raźličvała», — dadaje dziaŭčyna i adznačaje, što sistema padliku sychodzicca z toj, jakuju ŭžyvali na RT.
Ź joj zhodny i Viktar ź Minska, u jakoha vynik ekzamienu pa ruskaj źmianiŭsia z 63 da 75: «Novaja mietodyka raźliku» — heta prosta staryja tablicy CT».
Dla syna Aleny ź Minska pieralik paŭpłyvaje i na hadavuju adznaku pa biełaruskaj u atestacie: z 44 bałaŭ vynik pavialičyŭsia da 56, a za hod zamiest 7 budzie 8. Sama žančyna pracuje nastaŭnicaj i taksama ŭpeŭnienaja: toje, što RIKV nazvaŭ novaj sistemaj, — heta prosta tablica pieravodu bałaŭ na RT sioleta.
Vyniki CE pa ruskaj i biełaruskaj movach školniki atrymali ŭ paniadziełak, 29 maja. Ubačanaje aburyła mnohich: bały paličyli pa novaj sistemie, i ŭ vyniku cana pamyłki dla tych, chto dapuściŭ usiaho adnu, była značna vyšejšaj, čym dla tych, chto daŭ šmat niapravilnych adkazaŭ. U toj ža dzień RIKV zajaviŭ, što vyniki viernyja i nijakaha pieraliku nie budzie.
Praŭda, paśla taho jak skandał pryciahnuŭ uvahu Łukašenki i toj daručyŭ pieraličyć vyniki, pastanova RIKV źmianiłasia, niahledziačy na zabaronu ŭ zakanadaŭstvie.
Čytajcie taksama:
Pieršy CE pieraličać pa novaj mietodycy. Vyniki možna budzie daznacca ŭžo siońnia
Jak padličvajuć bały na centralizavanym ekzamienie i čamu heta schiema vyklikała abureńnie
Minadukacyi: Adznaki na CE pierahladu nie padlahajuć. Apielacyju padać nielha
U skandał z centralizavanym ekzamienam svaje piać kapiejek ustaviŭ Łukašenka