Jančeŭski stvaraje ŭ Emiratach finansavuju prakładku dla rezidentaŭ PVT
Jak stała viadoma «Našaj Nivie», administracyja Parka vysokich technałohij u hetyja tydni rehistruje jurydyčnuju asobu ŭ Abjadnanych Arabskich Emiratach. Cieraź jaje źbirajucca vadzić hrošy tych biełaruskich IT-kampanij i zamiežnych zamoŭcaŭ, jakija nie mohuć pracavać naŭprost ź Biełaruśsiu paśla pačatku poŭnamaštabnaj vajny va Ukrainie.
07.06.2023 / 13:58
Usievaład Jančeŭski. Fota: BiełTA
«Rabota viadziecca i chutka budzie skončana», — paviedamiŭ «Našaj Nivie» abaznany surazmoŭca, kamientujučy chod adkryćcia jurydyčnaj prakładki PVT u AAE.
Paśla adkryćcia jurydyčnaj asoby dla jaje buduć adkrytyja valutnyja rachunki ŭ bankach AAE.
Dla čaho heta robicca?
Ideja adkryćcia kampanii ŭ AAE naležyć kiraŭnictvu Parka vysokich technałohij. Uznačalvaje PVT Usievaład Jančeŭski.
Z adnaho boku, patreba vynikaje ź situacyi na rynkach: praz uskładnieńni finansavych adnosin pamiž biełaruskimi bankami i bankami raźvitych krain uźnikajuć ciažkaści ŭ apłacie pasłuh tych biełaruskich kampanij, jakija pa svaich pryčynach zastajucca ŭ Biełarusi, pracujučy pry hetym na zachodnija rynki.
Stvaryŭšy jurydyčnuju asobu ŭ Emiratach, kiraŭnictva PVT spadziajecca takim čynam vyrašyć prablemu takich kampanij. Płanujecca, što zachodni zamoŭca budzie płacić nie ŭ takuju taksičnuju jurysdykcyju, jakoj ciapier źjaŭlajecca biełaruskaja, a na rachunki PVTšnaj prakładki ŭ AAE. A ŭžo potym hetyja hrošy buduć traplać u Biełaruś. Imavierna, u valucie adroznaj ad valuty prychodu. Naprykład, kanviertavanyja ŭ juani.
PVT budzie mieć z hetaha svoj pracent za absłuhoŭvańnie.
Fota: Belarus.by
Kolki kampanij patencyjna zmohuć karystacca pasłuhaj prakładki? Adkaz nie vidavočny.
Jak tłumačać udzielniki rynku, prablema, jakuju sprabuje vyrašyć Jančeŭski, uźnikła nie ŭčora, i pieravažnaja bolšaść metavaj aŭdytoryi ŭžo paśpieła znajści varyjanty raboty, paadkryvaŭšy ofisy i rachunki ŭ tych jurysdykcyjach, kudy atrymlivajuć hrošy ad zamoŭcaŭ, a potym, chacia i nie bieź ciažkaściaŭ, vyvodziać hrošy ŭ Biełaruś.
U ajcišnych kołach nazyvajuć dziejańni zapoźnienymi, ale taksama bačać i mahčymaje dvajnoje dno.
«Usie narmalnyja ludzi ŭžo daŭno razabralisia z tym, jak atrymlivać hrošy kudyści ŭ inšaje miesca, a potym pieravodzić ich u Biełaruś. A kali niechta nie razabraŭsia, to zaŭsiody praściej paprasić ab pasiarednictvie svaich znajomych, čym dziaržavu.
Tamu ŭ hetaj idei možna bačyć abo ŭžo niesvaječasovuju sprobu dapamahčy, abo zadumku ź inšymi matyvami.
Ad našaj dziaržavy nielha čakać ničoha dobraha, i ja čuŭ pieraściarohi, što zahon u hetuju prakładku budzie adbyvacca prymusova, tamu što łukašysty ŭvieś čas padazrajuć IT kampanii ŭ tym, što častku prybytku jany pakidajuć za miažoj, davodziačy da radzimy nie realna zaroblenyja sumy, a tolki tyja, jakija ličać nieabchodnym pakazać.
Adpaviedna, žadańnie ŭbačyć realnyja pamiery finansavych płyniaŭ asobnych hulcoŭ — jašče adno mahčymaje prymianieńnie prakładki. Možna budzie ekstrapalavać hetyja danyja na inšyja kampanii i spytać u ich «a dzie hrošy?», — ličyć adzin z kiraŭnikoŭ vialikaj IT-kampanii.
Cikava było b u hetaj historyi razumieć i matyvacyju arabaŭ, jakija pradastaŭlajuć chab dla krainy, suprać bankaŭ jakoj dziejničajuć sankcyi.
«Na hety kont pakul što možna tolki śpiekulavać. Naŭradci pracenty na absłuhoŭvańni biełaruskaj ajciški — heta tyja hrošy, jakija ŭ pryncypie zaŭvažyć finansavy siektar AAE. Ale jość i inšyja intaresanty. Adzin z punktaŭ KRI profilnych čynoŭnikaŭ u AAE źjaŭlajecca pryvod, arhanizacyja raboty ŭ krainie vysokatechnałahičnaha biznesu. U hetym sensie, ja dumaju, z administracyjnaha boku isnuje poŭnaja padtrymka.
A kali kazać pra intaresy biznesu, to, atrymaŭšy infarmacyju ab finansavym stanie kampanij biełaruskaj ajciški, araby buduć mieć razumieńnie, što z hetaha rabočaje. I ŭžo na padstavie hetaj infarmacyi možna budzie prykidvać, jakuju kampaniju možna vykupić, u jakuju zajści kapitałam, słovam, na čym možna zarabić. Pakul što hetaha razumieńnia ŭ arabaŭ niama, a atrymajuć jany jaho ličy što zadarma», — razvažaje jašče adzin infarmavany surazmoŭca.
Čytajcie taksama:
Kaho jašče ŭziali ŭ PVT i kudy idzie industryja na prykładzie naboru-2023