На мінскай вуліцы Харкаўскай зносяць будынак былога кінатэатра «Сучаснік»
У Мінску пачаўся знос будынка былога кінатэатра «Сучаснік» на вуліцы Харкаўскай, паведамляюць «Мінск-Навіны».
27.06.2023 / 22:23
Кінатэатр «Сучаснік» з-за незапатрабаванасці спыніў сваю працу яшчэ ў 2002 годзе. Былі прапановы перарабіць яго ў палац культуры, яшчэ пазней — адкрыць усярэдзіне забаўляльны комплекс са спартыўным клубам, кіназалай і гасцініцай.
Аднак праект так і не ўвасобілі ў жыццё — праз пару гадоў будоўля прыпынілася, а ў 2016 годзе і зусім была закансерваваная. З тых часоў разбураны будынак стаў прытулкам для мясцовых бяздомных і творчай пляцоўкай для графіцістаў-аматараў.
Цяпер будынак актыўна дэмантуюць, а тэрыторыю, дзе размяшчаўся кінатэатр, ачысцяць і ператвораць у працяг Тучынскага сквера.
Работы плануюць завяршыць да канца наступнага месяца.