У Крычаве ў парку паставілі новыя прыбіральні, якія тояць у сабе загадку
Супрацоўніца крычаўскай раёнкі зайшла ў мясцовы парк і пабачыла там свежапабудаваныя драўляныя прыбіральні, якія таілі ў сабе загадку. Нягледзячы на ўсе намаганні, разгадаць яна яе так і не змагла.
26.07.2023 / 22:48
Новыя прыбіральні выглядалі акуратна, а дзівіла канструкцыя прыстасаванняў для замыкання.
На адной прыбіральні былі засаўкі, але месціліся яны не ўнутры, а звонку, а паколькі адтуліна для засаўкі размяшчалася зусім на іншай вышыні, то зачыніць «шпакоўню» немагчыма ўвогуле.
На другой прыбіральні замок таксама месціцца звонку, адтуліны ж для засаўкі і зусім няма.
«Па логіцы атрымліваецца, што адзін ты ў прыбіральні ў гэтым парку схадзіць не зможаш, бо знутры зачыніцца не атрымаецца. А навошта засаўка звонку, для мяне так і засталося загадкай, ну, толькі калі гэтую прыбіральню зрабілі, а потым вывернулі навыварат», — абураецца жанчына.
І прыходзіць да лагічнай высновы, што праца была зроблена абы з рук:
«Магчыма, атрымаўшы заданне, адказны работнік «Камунальніка» вырашыў, што трэба ўсё выканаць і ўсталяваць засаўку, а вось унутры ці звонку — гэта ўжо зусім не важна».
Чытайце таксама:
У Мінску пажылой жанчыне нечым не дагадзілі пракатныя самакаты, і яна ім адпомсціла ВІДЭА
У Бураціі сям'і мабілізаванага, які знік без вестак, пабудавалі драўляную прыбіральню