«Heta byŭ šok, 160 rubloŭ za niedastaŭku». Čamu za viartańnie pasyłki prosiać u razy bolš za jaje samu?
U redakcyju «Anłajniera» źviarnuŭsia čytač Dzianis. Jon adpraviŭ karobku cukierak u Kitaj, zapłaciŭšy za heta 66 rubloŭ. Adnak pasyłku nie dastavili, a kab zabrać cukierki nazad, jamu treba zapłacić jašče bolš — 92 rubli. Redakcyja spytałasia ŭ «Biełpošty», u čym tut sprava.
17.04.2024 / 16:23
Usio było tak: siaredzina studzienia, nabližajecca kitajski Novy hod. Dzianis kuplaje navahodniuju karobku cukierak «Kamunarka» prykładna za 40 rubloŭ i adpraŭlaje jaje svajoj znajomaj u Kitaj.
Pavodle jaho słoŭ, zapaŭniaje papiery pa instrukcyi supracoŭnika, usio praviarajuć niekalki razoŭ. Dastaŭka abychodzicca ŭ 66 rubloŭ. A praz paru miesiacaŭ, 3 krasavika, pasyłka viartajecca nazad.
Čytač kaža, što nijakich apaviaščeńniaŭ ni jon, ni znajomaja ŭ Kitai nie atrymlivali. Kab zabrać pasyłku nazad, treba apłacić zvarotnuju pierasyłku — 92 rubli.
«Heta byŭ šok, 160 rubloŭ za niedastaŭku. Pasyłku ja, viadoma, nie zabraŭ, takija darahija cukierki mnie nie patrebnyja».
U pres-słužbie «Biełpošty» karespandentu «Anłajnier» rastłumačyli, što ŭ mižnarodnych paštovych adpraŭleńniach adpraŭnik apłačvaje pierasyłku ź Biełarusi ŭ krainu pryznačeńnia ŭ adpaviednaści z taryfami, jakija dziejničajuć na momant adpraŭki. A viarnucca pasyłka moža ŭžo pa inšym taryfie.
«U adpaviednaści z aktami Suśvietnaha paštovaha sajuza, pry viartańni pasyłak kraina, jakaja viartaje pasyłku, vyznačaje taryf za hetuju pasłuhu. Hrošy pa im spahaniajucca z adpraŭnika, kali jamu ŭručajuć pasyłku. Hety taryf moža nie supadać z taryfam, vypłačanym pry adpraŭcy pasyłki».
Što da paviedamleńniaŭ, to ŭ «Biełpošcie» havorać, što za heta adkazvaje nacyjanalny apieratar — u tym paradku, jaki dziejničaje ŭ krainie pryznačeńnia. Kali ž pasyłka viartajecca, to ŭ Biełarusi paviedamlajuć tak:
- Kali paznačany numar mabilnaha — nakiroŭvajuć paviedamleńnie praz nacyjanalnuju paštovuju elektronnuju sistemu.
- Kali čałaviek nie zarehistravany ŭ hetaj sistemie — nakiroŭvajuć paviedamleńnie ŭ Viber.
- Kali čałaviek nie zarehistravany ŭ Viber abo zabłakavaŭ tam uvachodnyja, abo kali paviedamleńnie nie było dastaŭlena na praciahu dvuch hadzin (naprykład, atrymalnik byŭ bieź internetu), nakiroŭvajuć SMS-paviedamleńnie.
- Kali niama numara mabilnaha — u paštovuju skryniu (kali jana spraŭnaja) adpraŭlajuć papiarovaje paviedamleńnie.
Hety ałharytm apaviaščeńniaŭ pracuje i pry viartańni mižnarodnych pasyłak, i pry viartańni pasyłak pa krainie. Kali pasyłku viartajuć, pryčynu paznačajuć na śpiecyjalnym cetliku.
U «Biełpošcie» adznačajuć, što samaja raspaŭsiudžanaja pryčyna — skončyŭsia termin zachoŭvańnia. Kali pryčyna nie paznačanaja abo adpraŭnik ź joj nie zhodny, jon moža padać rekłamacyju. Heta płatna — 6,60 rubla, i treba budzie prykłaści kvitancyju, jakuju dali pry adpraŭcy.
Čarhovaja schiema: «Biełpošta» papiaredžvaje pra paviedamleńni machlaroŭ u miesiendžarach
Jeŭrapošta dazvoliła adpraŭlać pasyłki za košt atrymalnikaŭ
Paštamaty akazalisia niezapatrabavanyja ŭ Biełarusi