Sieryjał, jaki pastaviŭ na vušy ŭsiu Rasiju
Rasijskija čynoŭniki patrabujuć zabaranić pakaz sieryjała «Škoła». Biełarusy pakul tolki pačynajuć hladzieć film.
25.01.2010 / 14:06
Rasijskija čynoŭniki patrabujuć zabaranić pakaz sieryjała «Škoła». Biełarusy pakul tolki pačynajuć hladzieć film.
Dva tydni jak na Pieršym rasijskim kanale pačaŭsia šmatsieryjny film «Škoła». Režysioram filma vystupiła Valeryja Haj Hiermanika, viadomaja svaim filmam «Usie pamruć, a ja zastanusia», što vyklikaŭ vialiki rezanans. «Škoła» — žorstkaja drama, u jakoj stvorany efiekt realistyčnaści siužetaŭ. Vučni ŭ škole, adlustravanaj Hiermanikaj, pjuć piva na pieramienach, palać, bjucca, chamiać nastaŭnikam.
Sieryjał vyklikaŭ vielmi burnaje abmierkavańnie ŭ rasijskim hramadstvie.
Vyznačylisia dva łahiery — tyja, chto ličyć jaho abvostranym adlustravańniem realnaj situacyi ŭ rasijskich škołach, jaki dapamoža pryciahnuć uvahu hramadstva na ich prablemy, i tyja, chto vystupaje za zabaronu pakazu filmu.
Kinastužka źviarnuła na siabie i ŭvahu ŭładaŭ, jakija zajavili, što «takich pieradačaŭ być nie pavinna». Dla mnohich ža naohuł zastałosia zahadkaj, jak taki film moh być dapuščany ŭ efir, što dosyć mocna padviarhajecca cenzury. Z krytykaj vystupili i rasijskija nastaŭniki, jakija ličać, što jon dyskredytuje ich prafiesiju, a taksama RPC, pradstaŭniki jakoj zajavili, što sieryjał nie adpaviadaje praŭdzie i nie daje stanoŭčaha prykładu moładzi.
Sama Haj Hiermanika nazvała film «mizernym adlustravańniem taho, što adbyvajecca».
«Jany (krytyki karciny) kažuć «čarnucha», tak?… Jany abvinavačvajuć mianie ŭ žorstkaści, a moj film — usiaho tolki mizernaje adiustravańnie taho, što adbyvajecca… Jaki hladač, taki i film», — zajaviła režysior u intervju haziecie «Kommiersant».
Siarod padletkaŭ film atrymaŭ vielizarnuju papularnaść. U sacyjalnaj sietcy «Vkontakcie» fan‑hrupa «Škoły» składaje bolš za 10 tysiač čałaviek. Padletki stali identyfikavać siabie ź jahonymi hierojami.
U Biełarusi sieryjał pakul nie abmiarkoŭvajecca šyroka, tamu što Pieršy rasijski kanał možna hladzieć u nas tolki pa spadarožnikavym telebačańni. Nahadajem, što ŭ 2002 hodzie kanał zamianiŭ biełarusizavany varyjant ANT, a ŭ 2008 hodzie hety kanał źnik z kabielnych sietak razam z šeraham inšych rasijskich telekanałaŭ. Tym nie mienš, sieryjał «Škoła»ŭžo tydzień jak aktyŭna vandruje pa biełaruskich internet‑sietkach.
Epizod ź sieryjała «Škoła»: