Zahinuŭ mahiloŭski apieratar Biełsatu Vadzim Aršynski
Pry ŭvachodzie ŭ svoj padjezd jaho zavaliła budaŭničym druzam i źlažałym śnieham.
18.02.2010 / 16:36
Trahiedyja zdaryłasia ŭ čaćvier 18 lutaha pryblizna a 12-j hadzinie dnia, kali Vadzim Aršynski viartaŭsia damoŭ z čarhovych zdymak.
Vadzim Aršynski.
Pra heta paviedamiŭ mahiloŭski žurnalist Hienadź Sudnik. Dom, u jakim žyvie siamja Aršynskaha, ramantujecca, tamu nad uvachodami ŭ padjezdy zroblenyja admysłovyja draŭlanyja naviesy. Akurat u toj momant, kali V. Aršynski kročyŭ pad navies, z dachu na jaho abrynułasia sumieś budaŭničaha druzu i źlažałaha śniehu.
Navies ad udaru nie vytrymaŭ i abrušyŭsia na žurnalista.
Pa słovach sp. Sudnika, budaŭniki vyklikali «chutkuju», ale ŭžo było pozna. Z balnicy žoncy Vadzima patelefanavali ź jaho telefona i paviedamili pra jahonuju śmierć.
Vadzimu Aršynskamu było 50 hadoŭ. Prafiesijny apieratar. Supracoŭničaŭ ź niezaležnymi ŚMI, u tym liku z telekanałam «Biełsat». U jaho zastałosia dvoje synoŭ.
Redakcyja «Našaj Nivy» vykazvaje spačuvańni siamji Vadzima Aršynskaha.