Pavodka moža zakranuć 77 nasielenych punktaŭ, dzie žyvie amal 55 tys. čałaviek
03.03.2010 / 14:14
Pavodle prahnozaŭ ekśpiertaŭ, pry samym niespryjalnym raźvićci situacyi viasnovaja pavodka ŭ Biełarusi moža zakranuć 77 nasielenych punktaŭ, u jakich žyvie amal 55 tys. čałaviek.
Pra heta paviedamiŭ ministr pa nadzvyčajnych situacyjach Envier Baryjeŭ 3 sakavika na pres‑kanfierencyi ŭ Minsku.
Pavodle jaho słoŭ, mahčymaj evakuacyi budzie padlahać pryblizna 3,9 tys. čałaviek, padtapleńnie vierahodna bolš čym na 1,9 tys. padvorkaŭ. Mahčyma taksama padtapleńnie dzieviaci ŭčastkaŭ daroh.
Miescami padtapleńniaŭ mohuć stać šeść zon:
Paleskaja, Łojeŭskaja, Dobrušskaja, Słaŭharadskaja, Čavuskaja i Vierchniadźvinskaja,
paviedamiŭ Baryjeŭ. Čakajecca, što maksimalnyja ŭzroŭni pavodki buduć pieravyšać siarednija šmathadovyja značeńni.
U Paleskaj zonie raźvićcio viasnovaj pavodki čakajecca pryblizna ŭ siaredzinie sakavika, u Vierchniadźvinskaj — u treciaj dekadzie sakavika.
Kiraŭnik MNS adznačyŭ, što akramia pavodki hetym hodam isnuje vierahodnaść uźniknieńnia prablem, źviazanych z pavyšeńniem uzroŭniu vady ŭ suviazi z rastavańniem śniehu ŭ nasielenych punktach. Heta taksama moža pryvieści da padtapleńnia padvorkaŭ.
Jak zajaviŭ ministr, MNS hatova apieratyŭna reahavać na raźvićcio viasnovych pracesaŭ pavodki. Pa kožnym rehijonie padrychtavany płan dziejańniaŭ, raspracavany z ulikam samaha niespryjalnaha raźvićcia situacyi.