Dakažy, što piva biezałkaholnaje — i pi spakojna
03.03.2010 / 17:28
3 sakavika na sajcie HUUS Minharvykankama raźmieščany adkazy na pytańni ab zabaronie na raśpivańnie ałkaholnych, słabaałkaholnych napojaŭ i piva ŭ hramadskich miescach.
Nahadajem, adkaznaść za takija dziejańni ŭstanoŭlena papraŭkami ŭ Kodeks ab administracyjnych pravaparušeńniach, jakija nabyli moc 23 lutaha. Za pierš tydzień ich prymianieńnia ŭ dačynieńni da pravaparušalnikaŭ tolki ŭ Minsku byli składzieny 354 pratakoły.
U HUUS patłumačyli, što da hramadskich miescaŭ adnosiacca ŭčastki miascovaści, budynki, zbudavańni, maršrutnyja transpartnyja srodki, jakija znachodziacca ŭ miežach nasielenaha punkta, za vyklučeńniem žylla i aharodžanych učastkaŭ miascovaści, sumiežnych z žyllom hramadzian indyvidualnaj zabudovy, a taksama jakija znachodziacca pa‑za miežami nasielenaha punkta maršrutnyja transpartnyja srodki, budynki i zbudavańni, pryznačanyja dla svabodnaha (za płatu) naviedvańnia hramadzianami.
Nie adnosicca da hramadskich miescaŭ bałkon ułasnaj kvatery, a za raśpivańnie piva na ahulnym bałkonie abo bałkonie na niekalki kvater mohuć aštrafavać.
Biez bojazi, jak śćviardžajuć u staličnaj milicyi, u hramadskich miescach možna ŭžyvać biezałkaholnaje piva.
U HUUS taksama papiaredžvajuć, što ŭ adpaviednaści z artykułam 10.13 Pracesualna‑vykanaŭčaha kodeksa ab administracyjnych pravaparušeńniach supracoŭniki milicyi majuć prava pravieryć rečy hramadzianina na pradmiet znachodžańnia ŭ ich adkrytaj butelki śpirtnoha. Padstavaj dla hetaha źjaŭlajecca »najaŭnaść dastatkovych padstaŭ mierkavać, što ŭ chodzie ahladu mohuć być vyjaŭleny ślady administracyjnaha pravaparušeńnia, inšyja materyjalnyja abjekty, vyśvietleny inšyja abstaviny, jakija majuć značeńnie dla spravy ab administracyjnym pravaparušeńni. Admovicca ad takoha ahladu čałaviek nie maje prava. U advarotnym vypadku ŭ adpaviednaści z artykułam 8.2 PVKoAP supracoŭnik milicyi budzie abaviazany dastavić jaho ŭ orhan unutranych spraŭ dla vobysku.
Staličnaja milicyja nahadvaje: na stadyjon zabaroniena pranosić piva.