Bajniet buduć rehistravać biaspłatna
Jančeŭski: Rehistracyja paštovych skryniaŭ — absurd
02.06.2010 / 17:37
Dziaržaŭnaja rehistracyja ŭsich infarmacyjnych sietak, sistem i resursaŭ nacyjanalnaha siehmienta internieta budzie rabicca biaspłatna.
Takoje paviedamleńnie źjaviłasia 2 červienia na aficyjnym sajcie Dziaržaŭnaj inśpiekcyi pa elektrasuviazi Ministerstva suviazi i infarmatyzacyi (BiełDIE).
Raźmieščanyja na terytoryi Biełarusi interniet‑resursy, infarmacyjnyja sistemy i sietki nieabchodna zarehistravać da 1 lipienia 2010 hoda. Heta praduhledžana pastanovaj Saŭmina № 644 ad 29 krasavika «Ab niekatorych pytańniach udaskanaleńnia vykarystańnia nacyjanalnaha siehmienta hłabalnaj kampjuternaj sietki interniet».
Dakumient pryniaty z metaj vykanańnia padpisanaha 1 lutaha ŭkaza prezidenta № 60 «Ab mierach pa ŭdaskanaleńni vykarystańnia nacyjanalnaha siehmienta sietki interniet».
Zabiaśpiečyć dziaržrehistracyju resursaŭ daručana Minsuviazi, jakoje delehavała funkcyi rehistratara BiełDIE.
Rehistracyjaj buduć vymušanyja zajmacca pastaŭščyki interniet‑pasłuh — chostynhavyja kampanii i interniet‑pravajdery.
Pry hetym praces rehistracyi prapanoŭvajecca ažyćciaŭlać na padstavie ankiety zajaŭnika, jakaja składajecca bolš čym z 30 punktaŭ.
Raniej taksama było vyznačana, što rehistracyja interniet‑sajtaŭ budzie płatnaj. Praduhledžvałasia, što adnarazovaja rehistracyja budzie kaštavać 16.800 rubloŭ z PDK.
Pra toje, što rehistracyja biełaruskich sajtaŭ pavinna być biaspłatnaj, zajaviŭ u hutarcy z karespandentam partała tut.by pamočnik prezidenta Usievaład Jančeŭski.
«Z Administracyjaj prezidenta pastanovy Saŭmina nichto nie ŭzhadniaŭ. Svaje pastanovy Saŭmin maje prava prymać sam. Jon ich i pryniaŭ. Darečy, u samich pastanovach razmova, naprykład, ab apłacie rehistracyi nie idzie. Heta ŭžo inicyjatyvy struktur Minsuviazi. Skažu ščyra: inicyjatyvy — i hetaja, i inšyja — bolš čym dziŭnyja.
Biarem samy aburalny prykład — rehistracyju paštovych skryniaŭ. Heta ž poŭny absurd! Sama rehistracyja sajtaŭ pavinna być biaspłatnaj. Ja ŭ hetym upeŭnieny stopracentna.
Takaja ž pazicyja była i ŭ AAC [Apieratyŭna‑analityčnaha centra]. Adnosna identyfikacyi karystalnikaŭ: usio treba zrabić akuratna. Maja pazicyja — nie treba nijakaj samadziejnaści. Biarem jeŭrapiejski vopyt — i ŭsio. Kropka», — zajaviŭ Jančeŭski.