Спачатку група нямецкіх вайсковых інструктараў не змагла выляцець з Балгарыі з-за таго, што іх самалёт зламаўся. Немцы даляцелі на галандскім самалёце. Потым аказалася, што зброя, карыстацца якой яны мусілі навучыць курдскіх салдат, што ваююць з ісламістамі, знаходзіцца ў дрэнным стане і не заўсёды можа быць выкарыстаная.
Вайскова-транспартны самалёт С-160.
Гэтыя інцыдэнты, як піша Associated Press, дэманструюць, наколькі моцна вайсковая моц лідара Еўрасаюза адстае ад ягонай эканамічнай магутнасці.
Нямецкія СМІ, спасылаючыся на канфідэнцыяльны дакумент, перададзены дэпутатам Бундэстага на мінулым тыдні, пішуць пра вялікія праблемы з вайсковай тэхнікай, якая маецца на ўзбраенні 182-тысячнага Бундэсвера.
Згодна з гэтай інфармацыяй, толькі 24 з 43 транспартных самалётаў С-160, толькі 42 з 109 знішчальнікаў Eurofighter і 38 з 89 знішчальнікаў Tornado, якія маюцца ў Люфтвафэ, знаходзяцца ў працаздольным стане.
Міністэрства абароны краіны адмовілася ад таго, каб падцвердзіць ці абвергнуць гэтыя дадзеныя.
Былы начальнік генштаба Германіі Харальд Куят адзначыў, што часткова дрэнны стан нямецкай арміі выкліканы хранічнай нястачай грошай. Каб збалансаваць бюджэт, урад у гэтым годзе скараціў выдаткі на ўзброеныя сілы прыкладна на 800 млн еўра да 32,44 млрд. Гэты аб'ём, як і ў большасці краінаў Еўрасаюза, значна меньшы, чым рэкамендаваныя Арганізацыяй Паўночна-Атлантычнай Дамовы 2% ўнутранага валавага прадукту.
Вучэнне нямецкай пяхоты.
Такім чынам, у пераліку на 1 салдата і афіцэра з бюджэту Германіі ў год у сярэднім выдаткоўваецца амаль 180.000 еўра — гэта грошы на ўсе віды баявога, тэхнічнага, матэрыяльнага і сацыяльнага забяспячэння.
У Беларусі ў 2014 годзе аналагічны паказчык выдаткаў на 1 салдата складае каля 8.000 еўра.
