У Тэгеране прыведзены ў выкананне смяротны прысуд 26-гадовай іранцы Райханэ Джабары, асуджанай за забойства мужчыны, які спрабаваў яе згвалціць.
Джабары была павешана у турме, нягледзячы на міжнародную кампанію, якая заклікала адтэрмінаваць або адмяніць пакаранне.
Дзяўчына была арыштаваная ў 2007 годзе за забойства Муртазы Абдулалі Сарбандзі, у мінулым супрацоўніка іранскай выведкі.
Праваабаронцы з Amnesty International настойваюць, што следства па справе Джабары праходзіла з сур'ёзнымі парушэннямі.
У мінулым месяцы ў сацыяльных сетках была распачатая маштабная кампанія ў абарону асуджанай, і да апошняга часу здавалася, што пакаранне ўдасца прадухіліць.
Аднак у суботу дзяржаўнае агенцтва Таснім паведаміла, што смяротны прысуд Джабары быў прыведзены ў выкананне, пасля таго як сям'і асуджанай не ўдалося дамовіцца аб змякчэнні прысуду са сваякамі ахвяры.
Заявы дзяўчыны аб невінаватасці не знайшлі пацверджання ў судзе, падкрэсліваецца ў паведамленні агенцтва.
Маці Райханэ пацвердзіла Персідскай службе Бі-бі-сі факт пакарання, сказаўшы, што накіроўваецца на могілкі, каб развітацца з целам дачкі.
У пятніцу ім дазволілі апошняе гадзіннае спатканне.
Адразу пасля арышту Джабары была змешчана ў адзіночную камеру, дзе яна прабыла два месяцы, не маючы магчымасці звязацца з сям'ёй або адвакатамі.
У 2009 годзе суд у Тэгеране прысудзіў яе да смяротнага пакарання.
Праваабаронцы паведамляюць: хоць Райханэ Джабары прызнала, што ўдарыла Абдулалі Сарбандзі нажом у спіну, яна настойвала, што ў хаце быў трэці чалавек, які і здзейсніў забойства.
Па словах старэйшага сына ахвяры Джалала Сарбандзі, абвінавачаная адмовілася назваць імя гэтага чалавека.
«Толькі калі мы даведаемся пра яе сапраўдныя намеры, калі яна раскажа праўду аб сваім саўдзельніку і пра тое, што там адбылося, толькі тады мы будзем гатовыя яе пашкадаваць», — казаў Джалал журналістам у красавіку.
Паводлк дадзеных ААН, толькі ў бягучым годзе ў Іране было выканана 250 смяротных прысудаў.
