Італьянскі дыктатар Беніта Мусаліні пабудаваў некалькі бамбасховішчаў для сябе і сваёй сям'і ў часе Другой сусветнай вайны. З 31 кастрычніка ўсе яны будуць даступныя для турыстаў, паведаміла Reuters.
Калідор сакрэтнага бункера Мусаліні пад вілай Тарлонія ў Рыме.
Італія пачала вайну на баку Нямеччыны ў 1940 годзе ў спадзяванні на хуткую перамогу, калі нямецкія войскі ўжо глыбока ўварваліся на тэрыторыю Францыі. Але, адчуваючы небяспеку з боку дальняй бамбардыровачнай авіяцыі хаўруснікаў, «Дучэ» ужо тады загадаў пабудаваць бамбасховішчы для сябе і сваіх родных.
Мусаліні аб'яўляе вайну хаўруснікам 10 чэрвеня 1940 года.
Першы з бункераў быў даволі прымітыўным — яго перарабілі з віннага склепа на раскошнай рымскай віле Мусаліні. Потым пабудавалі яшчэ адзін, а трэці застаўся недабудаваным — у 1943 годзе італьянскія вайскоўцы, верныя каралю, арыштавалі «правадыра».
У лістападзе для публікі адчыняюцца ўсе тры бамбасховішчы.
