Ангельскамоўны гурт з Мінска саспеў да запісу песні на беларускай мове.
Пра сваё жаданне запісаць песню па-беларуску The Toobes паведамілі падчас свайго сумеснага канцэрту з Akute ў PrimeHall. У слухачоў меркаваньні адносна сур’ёзнасьці гэтага намеру разыйшліся, таму Tuzin.fm спраўдзіў інфармацыю ў дырэктара гурта Вячаслава Ламакіна. І той пацьвердзіў, што музыкі на поўным сур’ёзе разважаюць наконт таго, каб спець па-беларуску. Разглядаўся варыянт пераспяваць нешта з «Песняроў», але ў выніку ад яго адмовіліся. «Мы – аўтэнтычныя, таму не хочам як ва ўсіх. Маем песню з трэцяга альбому, якую Стас хацеў бы заспяваць па-беларуску. Але да гэтага трэба прыйсці. Я буду гэтае пытаньне лабіраваць», – зазначыў Вячаслаў.
Зь яго слоў, The Toobes падчас працы над сваім альбомам Road To The Big Time перажыў няпростую сытуацыю, звязаную з рознымі поглядамі на развіцьцё гурту. Не абыйшлося без канфліктаў, у выніку чаго адбыліся зьмены ў складзе. На дадзены момант непаразуменьняў нібы няма, і музыкі гатовыя думаць наконт далейшых крокаў, піша Tuzin.fm.
У 2010-м, у час уручэння ўзнагародаў Experty.by лідар The Toobes Стас Ламакін адмовіўся разумець па-беларуску: «Мне неприятно: вы говорите по-белорусски, мы по-русски. Мы на разных языках говорим. Мне это неприятно». З таго часу, бачым, адбылася эвалюцыя поглядаў.
