EPA
Прэзідэнт ЗША Барак Абама заклікаў не спяшацца з пашырэннем санкцый ЗША супраць Расіі з-за яе дзеянняў ва Украіне, паколькі гэта не паўплывае на Уладзіміра Пуціна і можа выклікаць рознагалоссі Вашынгтона і Еўропы.
Некаторыя амерыканскія кангрэсмены разглядаюць магчымасць увядзення новых санкцый супраць Масквы, аднак Абама заявіў, выступаючы ў чацвер на пасяджэнні Рады па экспарце, пра тое, што цяперашнія дзеянні ЗША ва ўнісон з Еўропай у рэшце рэшт прымусяць прэзідэнта Расіі Уладзіміра Пуціна перагледзець свае дзеянні ва Украіне.
«Думкі аб тым, што мы можам проста пашыраць санкцыі далей і далей, і ў выніку Пуцін перадумае, — я мяркую, гэта пралік», — сказаў Абама.
Паводле яго слоў, прызнанне таго, што Еўропа і Злучаныя Штаты будуць займаць агульную пазіцыю на працягу доўгага часу, у канчатковым выніку прымусіць Пуціна прыняць стратэгічнае рашэнне.
«Калі яны ўбачаць, што няма ніякіх расколін у кааліцыі, то з цягам часу вы будзеце сведкамі таго, як яны скажуць, што цана санкцый для іх эканомікі пераважвае любыя стратэгічныя перавагі, якія яны атрымліваюць», - сказаў Абама.