Будоўля на хутары Шаблі, фота Уладзіміра Шаблінскага
Гэтым летам на хутары Шаблі не пройдуць бітлоўскі фэст, «Вольнае паветра» ці «Дружба» — хутар будзе нават закрыты для арэнды.
Як распавёў гаспадар хутара Уладзімір Шаблінскі, Шаблі зноў прымуць гасцей у наступным годзе.
«З хутарам усё добра, — кажа Шаблінскі. — Прычына закрыцця — будоўля дома. Надышоў час гэтым спакойна заняцца. Канфліктаў з пабочнымі арганізацыямі ніякіх».
Па словах Шаблінскага, яго канцэртнае агенцтва мае планы на летнія фэсты, не звязаныя з хутарам, у іх ліку Міжнародны фестываль феерверкаў «Навальніца».
Хутар Шаблі ў Валожынскім раёне часта выступаў ў якасці канцэртнай пляцоўкі і месца правядзення музычных фэстаў, быў адзначаны мясцовым выканкамам за развіццё турызму. У 2013 годзе значна пацярпеў ад пажару. Новы дом будзе збудаваны на месцы згарэлага.
