У Светлагорску затрыманы мужчына з гранатай Ф-1, паведаміў супрацоўнік прэс-службы УУС Гомельскага аблвыканкама Віталь Прыстромаў.
У суботу, 24 верасня, Светлагорск святкаваў 55-годдзе з дня ўтварэння. У 16.00 на стадыёне пачаўся футбольны матч чэмпіянату Беларусі сярод каманд Першай лігі паміж мясцовым ФК «Хімік» і мінскім ФК «Зорка-БДУ».
«Праз гадзіну пасля пачатку сустрэчы міліцыянты, якія ажыццяўляюць пропуск на стадыён, заўважылі мужчыну, які, хістаючыся, ішоў да ўваходу. Убачыўшы, што праводзяцца надглядныя мерапрыемствы, ён рэзка павярнуўся і накіраваўся ўздоўж плота стадыёна», — распавёў Віталь Прыстромаў.
Мужчына паводзіў сябе вельмі падазрона, быў моцна п'яны. Калі ён пачаў пералазіць цераз агароджу, міліцыянты прынялі рашэнне аб затрыманні. Патрульныя прывялі мужчыну да службовага аўтамабіля і пры даглядзе знайшлі ў кішэні штаноў боепрыпас, які нагадваў гранату Ф-1. Былі прынятыя неабходныя меры для забеспячэння бяспекі, што дазволіла не праводзіць эвакуацыю гледачоў і не перарываць футбольны матч.
«Для вызначэння небяспекі прадмета i яго лiквiдацыi была выкліканая сапёрна-піратэхнічная група. Канфіскаваная «лімонка» сапраўды аказалася баявой гранатай Ф-1. На шчасце, узрывальнік быў прабітым, а вось начынка ўяўляла рэальную небяспеку», — удакладніў Віталь Прыстромаў.
Гранату знішчылі на палігоне пад Светлагорскам.
У дачыненні да 28-гадовага жыхара Светлагорска праводзяцца праверачныя мерапрыемствы для выяўлення прычын і акалічнасцяў сітуацыі.