Аўтамабіль «Рэно Меган» на трасе пад Бабруйскам збіў маці і дваіх яе дзяцей на пешаходным пераходзе, паведаміў БелТА в.а. начальніка ДАІ Бабруйскага раёна Ігар Чарноў.
ДТЗ адбылося каля 19.00 5 лістапада на 127-м кіламетры аўтадарогі М-5 Мінск — Гомель каля вёскі Баяры. У выніку наезду жанчына загінула на месцы здарэння, дзеці 2001 і 2003 гадоў нараджэння шпіталізаваныя ў Бабруйскую цэнтральную бальніцу з траўмамі рознай ступені цяжкасці (пераломы, удары і інш.).
Аўтамабіль рухаўся ў бок Гомеля, трое пешаходаў, пазначаныя святлоадбіўнымі элементамі, пераходзілі праезную частку па нерэгуляваным пешаходным пераходзе. Кіроўца позна заўважыў людзей.
Абставіны здарэння высвятляюцца, на месцы працуе следча-аператыўная група. У «Рэно» знаходзіліся жонка кіроўцы і аднагадовае дзіця, яны не пацярпелі.
Па факце ДТЗ Бабруйскі міжраённы аддзел Следчага камітэта распачаў крымінальную справу па ч. 2 арт. 317 КК.
