Прэм'ер-міністр Беларусі Андрэй Кабякоў 29 лістапада падчас пасяджэння ўрада, абмаляваў новую эканамічную матрыцу краіны, якая дазволіць выканаць пастаўленыя на 2017 г. задачы па сацыяльна-эканамічным развіцці краіны, паведамляе прэс-служба Саўміна.
Як адзначыў у пачатку пасяджэння прэм'ер, у кастрычніку прэзідэнт падпісаў указ аб задачах сацыяльна-эканамічнага развіцця краіны на 2017 год.
«Кіраўніком дзяржавы даручана выбудаваць поўную матрыцу персаніфікаваных паквартальных задач на 2017 год, мабілізуючы ўсю вертыкаль улады на дасягненне канкрэтных вынікаў. Ад урада і аблвыканкамаў патрабуецца арганізаваць працу кіраўнікоў усіх узроўняў, нацэліўшы іх на павышэнне эфектыўнасці вытворчасці тавараў і паслуг, зніжэнне выдаткаў, нарошчванне і дыверсіфікацыю экспарту, стварэнне новых працоўных месцаў, прыцягненне прамых замежных інвестыцый, а таксама вырашэнне іншых прыярытэтаў сацыяльна-эканамічнага развіцця краіны», - падкрэсліў Андрэй Кабякоў.
Прэм'ер-міністр заявіў, што пры фарміраванні прагнозу на 2017 год вызначаны структура прыросту ВУП.
«Палова — за кошт росту прадукцыйнасці працы на дзеючых прадпрыемствах, істотнага скарачэння выдаткаў, ўкаранення новых тэхналогій і ўдасканалення сістэмы кіравання, больш актыўнай і агрэсіўнай працы на знешніх рынках. Другую палову прыросту эканомікі плануем атрымаць за кошт так званай новай эканомікі. Фактычна гэтая задача вырашаецца праз развіццё малога і сярэдняга бізнесу, стварэнне новых прадпрыемстваў, новых працоўных месцаў, прыцягненне замежных інвестыцый. На гэтым грунтуюцца і мэтавыя задачы ў прадстаўленым праекце пастановы», — адзначыў Андрэй Кабякоў.
