Улады Шры-Ланкі ўводзяць поўную забарону на імпарт, вытворчасць і продаж у краіне пластыкавых пакетаў, упакоўкі, посуду і іншых прадметаў аднаразовага выкарыстання з пластыку, паведамляюць інфармагенцтвы са спасылкай на газету Daily Mirror.
Чакаецца, што забарона ўступіць у сілу ўжо з 1 верасня 2017 года.
Пры гэтым адначасова з увядзеннем забароны на пластыкавыя тавары ў Шры-Ланцы плануюць пачаць выпуск прадметаў ужытку з альтэрнатыўных матэрыялаў — паперы, трыснягу, тканіны, біяраскладальных пластмас. Кампаніі, якія будуць вырабляць дадзеную прадукцыю, атрымаюць падатковыя льготы.
Пластыкавае смецце, якое застаецца пасля выкарыстання ў сферы грамадскага харчавання і гандлю, прыводзіць да забруджвання вострава. Вялікая колькасць пластыкавых пакетаў у гарадскіх сцёках і рэках прывяла да застойвання вады, размнажэння маскітаў, распаўсюджвання малярыі і ліхаманкі дэнге.
