У Брэсцкай вобласці за суткі зніклі шэсць грыбнікоў, паведаміў БЕЛТА афіцыйны прадстаўнік УУС аблвыканкама Сяргей Дучэнка.
Паведамленні аб зніклых у лесе сваяках паступілі з Баранавіцкага і Ганцавіцкага раёнаў. У выніку аператыўна арганізаваных пошукаў пяць чалавек удалося знайсці.
А вось з 85-гадовым грыбніком з Ганцавіцкага раёна адбыўся няшчасны выпадак.
Жыхар вёскі Макаў 1932 года нараджэння адправіўся 3 верасня ў лес у грыбы і дадому не вярнуўся. Спачатку сваякі спрабавалі самастойна адшукаць дзядулю. Раніцай 4 верасня яны звярнуліся па дапамогу ў мясцовае аддзяленне міліцыі. Праз некалькі гадзін труп пенсіянера быў знойдзены пошукавай групай РАУС у меліярацыйным канале паблізу роднай вёскі.
