Еўрапейская камісія накіравала Польшчы другі напамін, які тычыцца заўваг у дачыненні да рэформы судовай сістэмы. Дзеянні камісіі ўпісваюцца ў рамкі другога этапу працэдуры аб парушэнні заканадаўства ЕС, паведамляе Радыё Польшча.
У Польшчы ёсць адзін месяц на тое, каб пракаментаваць заўвагі. Калі адказ Варшавы не задаволіць Брусель, ЕК накіруе пазоў супраць Польшчы ў Суд ЕС у Люксембургу. Суд можа абавязаць дзяржаву выплаціць фінансавы штраф.
Нагадаем, у канцы ліпеня Еўракамісія пачала ў дачыненні да Польшчы працэдуру аб парушэнні заканадаўства ЕС у сувязі з прыняццем закона аб судах агульнай юрысдыкцыі. Брусель паставіў пад сумнеў прадастаўленне міністру юстыцыі занадта шырокіх паўнамоцтваў у пытанні прызначэння суддзяў, а таксама рашуча запратэставаў супраць рознага пенсійнага ўзросту суддзяў у залежнасці ад полу. Аб гэтым Еўракамісія паведаміла ў сваім папярэднім лісце. Польскі бок у адказ заявіў, што кожная краіна мае права самастойна рэфармаваць сваю судовую сістэму, а Еўракамісія не мае права ацэньваць гэтыя змены.
