ІАЦ: У рэйтынгу самых любімых гледачамі тэлеканалаў «Беларусь-1» моцна прайграе расійскаму ТНТ 36

На пытанне «Які ў вас любімы тэлеканал» найбольшая колькасць гледачоў адказвае «НТВ-Беларусь». А «Беларусь-1» саступае ў рэйтынгу нават расійскаму забаўляльнаму ТНТ. Гэта канал, які транслюе серыялы, гумарыстычныя праграмы, а таксама шоу «Дом-2».

Такія вынікі даследаванняў, праведзеных у 2016 годзе пад эгідай Інфармацыйна-аналітычнага цэнтра пры Адміністрацыі прэзідэнта, апублікаваных у адпаведным статыстычным зборніку.

У даведніку не ўказваецца, колькі чалавек удзельнічала ў апытаннях і калі канкрэтна яны праводзіліся.

Звернемся да раздзела, прысвечанага СМІ. 86% апытаных атрымліваюць інфармацыю па тэлебачанні, 57% — у інтэрнэце, 43% — у друкаваных СМІ, 29% — па радыё.

Аднак варта ўдакладніць, што ў моладзі (18—29 гадоў) іншыя прыярытэты. Інфармацыю з інтэрнэту атрымлівае 91% рэспандэнтаў, 67% — з тэлебачання, 23% — з друкаваных СМІ, 20% — з радыё.

Самыя папулярныя тэлеканалы (глядзелі хоць раз на працягу месяца)

1. АНТ — 67,7% (любімая праграма на тэлеканале — ток-шоу «Няхай гавораць»)
2. «НТВ-Беларусь» — 64,6% (ток-шоу «Гаворым і паказваем»)
3. «Беларусь-1» — 59,7% (крымінальная хроніка «Зона Х»)
4. «РТР-Беларусь» — 54,8% (ток-шоу «Жывы эфір»)
5. «Беларусь-2» — 44,2% («Тэлебарометр»)
6. СТБ — 35,6% (кулінарнае шоу «Званая вячэра»)
7. «Мір» — 29,7%
8. ТНТ — 24,9%
9. «Беларусь-3» — 22,2%
10. «Беларусь-5» — 17%

Больш паказальным выглядае іншы спіс, які ўтварыўся з адказаў на пытанне пра любімы канал.

Які тэлеканал ваш любімы?

1. «НТВ-Беларусь» — 16,3%
2. «РТР-Беларусь» — 13,8%
3. АНТ — 10,8%
4. ТНТ — 8,2%
5. «Беларусь-1» — 4,5% 

Звяртае на сябе ўвагу лідарства тэлеканалаў, заснаваных на расійскім кантэнце. А «Беларусь-1» істотна прайграе ў глядацкай любові нават расійскаму забаўляльнаму ТНТ.

Самыя папулярныя газеты (чыталі хоць раз на працягу месяца)

1. «Советская Белоруссія» — 34,4%
2. «Камсамольская праўда» — 30,3%
3. «Аргументы і факты» — 29%
4. «Рэспубліка» — 9,9%
5. «З рук у рукі» — 9,2%

Якая газета ваша любімая?

1. «Камсамольская праўда» — 12,7%
2. «Советская Белоруссія» — 7,9%
3. «Аргументы і факты» — 7,6%
4. «Сябар пенсіянера» — 2,4%
5. «Жаночая газета» — 1,9%

Пры гэтым сцвярджаецца, што чытачоў газет найбольш цікавяць… міжнародныя падзеі. А мясцовыя навіны нібыта хвалююць у паўтара разу менш аўдыторыі.

Самая папулярная радыёстанцыя (слухалі хоць раз на працягу месяца)

1. Першы нацыянальны канал — 21%
2. «Радыус ФМ» — 19,1%
3. «Радыё Рокс» — 13,8%
4. «Рускае радыё» — 11,1%
5. «Альфа радыё» — 6,9%

Якая ваша любімая радыёстанцыя?

1. «Радыё Рокс» — 9,3%
2. Радыус ФМ — 6,8%
3. «Рускае радыё» — 5,7%
4. Першы нацыянальны канал — 4,3%
5. «Мелодыі стагоддзя» — 4,0%.

Самае любімае радыё ў беларусаў — тое, дзе круцяць найбольш расійскіх блатных песень.

На які сайт вы заходзілі за апошнія суткі?

1. «Укантакце» — 28,2%
2. «Аднакласнікі» — 24,1%
3. Tut.by — 19,7%
4. «Яндэкс» — 14,2%
5. «Гугл» — 11,3%
6. «Ютуб» — 10,8%
7. «Анлайнер» — 7,5%
8. Mail.ru — 7,4%
9. «Куфар» — 3,8%
10. «Фэйсбук» — 3,1% 

Які ваш сайт самы любімы?

1. «Аднакласнікі» — 14,1%
2. «Укантакце» — 10,9%
3. Tut.by — 6,2%
4. «Ютуб» — 6,2%
5. «Анлайнер» — 3,4%

Акаўнты «Укантакце» маюць 68,4% апытаных, у «Аднакласніках» — 67,5%. Астатнія сеткі значна адстаюць. У «Фэйсбуку» зарэгістраваныя 22,8% рэспандэнтаў, а ў «Інстаграме» — 9,7%. Далей ідуць «Мой мір» (4%), «Твітар» (3,7%) і «Ютуб» (3,2%).

Браніслаў Юрэвіч

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ