Ад 1 снежня «Наша Ніва» ўводзіць рэгістрацыю каментатараў. Гэта не наш капрыз, а патрабаванне заканадаўства. Калі ласка, пастаўцеся да новаўвядзенняў з разуменнем. Ідэнтыфікацыю дастаткова прайсці адзін раз, а пасля вы зможаце пісаць пад сваім нікам, як і раней. Зразумела, што і раней органы ўлады мелі тэхнічную магчымасць пры жаданні ідэнтыфікаваць таго ці іншага каментатара, так што ў рэальнасці нічога не зменіцца. Гэта, хутчэй, псіхалагічны бар'ер, каб змусіць людзей менш выказвацца, а больш маўчаць.
Для многіх «Наша Ніва» — гэта адзіная магчымасць выказвацца па-беларуску ва ўшчэнт русіфікаваным грамадстве. Не спыняйцеся пісаць каментары на NN.by. Для нас жыццёва неабходна чуць вашыя галасы!
Штодня на «НН» прыходзіць каля 1500 самых розных каментароў — і ўхвальных, і дыскусійных, і абураных. Гэта трэцяя па папулярнасці пляцоўка для абмеркаванняў сярод беларускіх СМІ.
Чыноўнікі хочуць, каб голас грамадства ў інтэрнэце заціх. Расчаруйце іх — давайце пакажам, што гатовыя і надалей выказваць сваё меркаванне.
У гэтыя хвіліны мы сканчаем працы па прывядзенні сістэмы каментавання новым нормам. Каментаванне на NN.BY часова адключанае і запрацуе на працягу бліжэйшых дзён.
Заставайцеся на НН.
