Мы ўжо расказвалі пра тое, чаму крута рэкламавацца на «НН», гаварылі пра найлепшыя натыўныя спецпраекты мінулага года. Але ж гэта далёка не ўсё, чым займаецца рэкламны аддзел. Ніжэй — дзесяць цікавых падыходаў да рэкламы прадуктаў і стварэння пазітыўнага іміджа брэндаў. Паехалі!
Чэмпіянат Беларусі па футболе
Фота Сяргея Гудзіліна.
Дзякуючы букмекерскай канторы «Марафон» мы пайшлі на смелы крок: з сакавіка па снежань сачылі за вышэйшай лігай па футболе, пісалі анонсы да кожнага з тураў і рабілі прагнозы.
Мы баяліся, што гэта будзе мала каму цікава, але тэксты пра беларускі футбол прачыталі больш за 120 тысяч разоў. Усцешыла нас і тое, што чытачы пакідалі свае прагнозы і актыўна абмяркоўвалі матчы вышэйшай лігі.
Як я шмат год жыву з алергіяй і чаму дактары выявілі яе толькі праз 5 год пакутаў
Фота Волі Афіцэравай.
Найбольш асабісты з нашых рэкламных артыкулаў: Каця Карпіцкая шчыра расказала пра шматгадовы досвед змагання з алергіяй і пра тое, якія з бытавых прылад могуць аблегчыць жыццё алергіка.
Матэрыял мы стварылі разам з анлайн-гіпермаркетам 21vek.by.
Топ-5 свежых летніх кактэйляў з квасам
Фота Волі Афіцэравай.
Нетыповы для «НН» фармат фудхантынгу: разам з квасам «Хатні» мы паэксперыментавалі з формамі ды складнікамі і прапанавалі пяць летніх кактэйляў на квасе.
З рэцэптамі нам дапамог бар «На пляжы», а экспертам-ацэншчыкам выступіла пяцігадовая Ксеня. Атрымалася смачна і прыгожа.
ТЭСТ: Што вы ведаеце пра лён?
Перад намі стаяла задача прэзентаваць новую калекцыю «Лён і гонар» брэнда адзення HONAR і зматываваць чытачоў набыць сабе ўпадабаную рэч.
Мы падрыхтавалі пытанні пра лён, праілюстраваўшы кожнае рэччу з новай калекцыі. Пасля таго, як карыстальнік абіраў адказ, ён бачыў не толькі тлумачэнне да яго, але і апісанне рэчы на фота са спасылкай на інтэрнэт-краму.
Кожны, хто адказаў правільна на 90-100% пытанняў, атрымаў прома-код на зніжку.
У выніку тэст прайшлі амаль 25 тысяч чалавек. Такі самы фармат мы выкарысталі і для прамоцыі новай калекцыі «Валошкі 2.0».
Як Наша Ніна глядзела паўфінал ЧС па футболе — найлепшыя каментары і ацэнкі
Фота Волі Афіцэравай.
Дзякуючы сэрвісу дастаўкі грузінскай ежы gruzin.by у дзяўчат з «Нашай Ніны» з'явілася нагода сабрацца разам, каб паглядзець паўфінал чэмпіянату свету па футболе і абмеркаваць матч, футбалістаў, а таксама свой досвед знаёмства з гульнёй №1.
Было і смачна, і цікава. Цяпер чакаем наступнага топ-турніру, каб зноў сабрацца разам.
Кейсы з velcom
Фота Волі Афіцэравай.
Летась мы вельмі плённа пасупрацоўнічалі з мабільным аператарам.
Вясной мы зрабілі відэа пра тое, як беларусы рэагуюць на старыя мабільныя тэлефоны.
Пасля разам з тарыфным планам «Камфорт+ для бізнэсу» мы паглядзелі, як уладкаваная кухня паспяховых беларускіх бізнэсаў: студыі па пашыве абутку Sutoria і праекта Rebox, які прапануе наборы прадуктаў з фотарэцэптамі.
У канцы года мы натхнілі школьнікаў на ўдзел у сацыяльна-адукацыйным праекце velcom YOUTH гісторыямі паспяховых беларусаў, а пасля наведалі майстар-класы, арганізаваныя ў межах праекта.
Зміцер Вайцюшкевіч — пра жонку, дзяцей ды ўласны хутар Вайцюшкі
Фота Настассі Роўды.
Летам мы з'ездзілі ў госці да Змітра Вайцюшкевіча і яго сям'і, каб душэўна паразмаўляць за барбекю ад «Суседзяў».
Вайцюшкевіч расказаў нам шмат гісторый: пра свой сцэнічны вобраз, пра знаёмства з жонкай і адносіны ў сям'і, пра любоў да Маякоўскага і хутар Вайцюшкі, а таксама пра свае мары.
Развенчваем міфы пра беларускія санаторыі на гіфках з коцікамі
Наконт санаторнага адпачынку існуе шмат міфаў, у якія многія чамусьці працягваюць верыць. Нібыта гэта дорага, сумна і нясмачна, хоць насамрэч гэта зусім не так.
Разам з сэрвісам анлайн-браніравання адпачынку ў Беларусі vetliva.by мы разбілі гэтыя міфы даволі арыгінальна — праз гіфкі з коцікамі!
Сустрэча з рэдакцыяй Wonderzine
Фота Волі Афіцэравай.
24 верасня «Наша Ніна» зладзіла сустрэчу ў Прэс-клубе з журналісткамі расійскага анлайн-выдання Wonderzinе. Рэдактарка раздела «Жыццё» Саша Савіна, б’юці-рэдактарка Маргарыта Вірава, а таксама рэдактарка росту і дыстрыбуцыі Ксюша Пятрова дзяліліся з беларускай публікай лайфхакамі па стварэнні аднаго з самых папулярных на постсавецкай прасторы рэсурсаў з карысным кантэнтам для жанчын.
Гэта быў наш першы досвед арганізацыі івэнтаў, і мы вельмі ўдзячныя партнёрам за дапамогу: гэта кампаніі «Мэбля, што расце», CeramoHeat, а таксама оптыка «Папялушка» на Незалежнасці, 16.
Ствараем беларускія вобразы на Хэлаўін
Фота Каці Карпіцкай.
Напярэдадні Хэлаўіна, які ў Беларусі нефармальна святкуюць усё больш актыўна, мы вырашылі крыху пафантазіраваць і замест папулярных персанажаў для касплэю накшталт вядзьмарак, вампіраў ці герояў Marvel Comics падумаць над беларускімі варыянтамі. Пасля гарачых абмеркаванняў было вырашана паспрабаваць пераўвасобіцца ў жэтончык мінскага метрапалітэна, панэльку, супрацоўніка Мінскзеленбуда і аднаго з бонсцікаў.
У гэтым нам дапамагла кампанія «Беліка-М». Мы скарысталіся адценачнымі бляск-бальзамамі і атрымалі сапраўды яркія вобразы.
Які з нашых праектаў вам найбольш спадабаўся? Пішыце ў каментарах, а таксама прапаноўвайце свае ідэі для матэрыялаў! І, калі вы хочаце добра прарэкламавацца, пішыце на [email protected].
Чытаць таксама:
10 прычын, чаму вам трэба рэкламавацца на «Нашай Ніве»
Топ-10 найлепшых рэкламных спецпраектаў «НН» за 2018 год
