Міністэрства асветы Грузіі плануе ўвесці ва ўсіх сярэдніх школах краіны кітайскую у якасці другой замежнай мовы, паведамляе Коммерсант.
Кіраўнік дэпартамента развіцця агульнай адукацыі міністэрства асветы Марыям Чыкабава патлумачыла, што рашэнне прынялі з улікам шматлікіх просьбаў школ і бацькоў. Ужо ў наступным навучальным годзе бацькі, чые дзеці перайшлі ў пяты клас, змогуць абраць у якасці другой абавязковай замежнай мовы кітайскую.
Першай абавязковай замежнай мовай у Грузіі лічыцца англійская, і дзеці вучаць яе з першага класа. Другой замежнай мовай, якую пачынаюць вывучаць з пятага класа сярэдняй школы, бацькі цяпер часцей за ўсё выбіраюць рускую. Аднак сітуацыя неўзабаве можа істотна змяніцца, і замест рускай грузінскія школьнікі будуць вывучаць кітайскую.
