Амерыканскія дактары заклікаюць грамадзян зрабіць прышчэпкі ад грыпу адразу пасля таго, як небяспечны сезон грыпу ў Аўстраліі выклікаў занепакоенасць наконт сёлетняга сезона гэтай хваробы, паведамляюць амерыканскія СМІ.
Лекары часта звяртаюць увагу на характар грыпу ў паўднёвым паўшар'і, каб зразумець, што будзе пазней у паўночным. Сёлета ў Аўстраліі назіраўся больш ранні, чым звычайна, пік захворвання на грып, і агулам сезон быў цяжкім. Дамінуючым штамам грыпу ў Аўстраліі быў вірус H3N2, які звычайна выклікае больш цяжкія захворванні, асабліва сярод пажылых людзей, і больш выпадкаў шпіталізацыі і смерці.
