Былы старшыня канцэрна «Белнафтахім» Ігар Жылін — адзін з сотні прадстаўнікоў лукашэнкаўскай наменклатуры, якія атрымалі бясплатна ці за бясцэнак надзел у Драздах. Адпаведнае рашэнне Мінгарвыканкам прыняў у красавіку 2012 года.
Ігар Жылін. Фота Grodnonews.by
Яго гісторыя адметная як мінімум двума абставінамі.
Па-першае, Жылін нарадзіўся і зрабіў кар’еру ў Расіі, быў нават дэпутатам Вярхоўнага Савета ў гэтай краіне ў пачатку 1990-ых. Але ў 2009-м годзе яго паклікалі кіраваць «Гродна Азотам», а пасля далі беларускае грамадзянства.
Па-другое, у 2014 годзе на Жыліна завялі крымінальную справу за злоўжыванне ўладай. Ён паспрабаваў адразу ж уцячы, а калі не атрымалася, то палічыў за лепшае прызнаць віну, кампенсаваць шкоду і ўсё ж рушыць дадому ў Расію.
А што катэдж у Драздах на вуліцы Вербнай? Будоўля прадказальна спынілася ў дзень ад’езду гаспадара. Яшчэ ў 2017 годзе Жылін выставіў дом на продаж за $350 тысяч. Дзяржава мела законную магчымасць канфіскаваць недабуд, але чамусьці не скарысталася ёй.
Як стала вядома «Нашай Ніве», у снежні 2019 года недабуд усё ж займеў новага ўласніка. Ім стаў хакеіст мінскага «Дынама» Андрэй Касціцын. У свой час ён пагуляў за акіянам, і кантракт у НХЛ перавышаў $3 мільёны на год.
Андрэй Касціцын. Фота Hcdinamo.by
Касціцын амаль не гандляваўся. Паводле інфармацыі з базы рэестра цэн, дом у Драздах быў набыты за $340 тысяч у эквіваленце.
Суседзі хакеіста — дырэктар «Белавія» Анатоль Гусараў і былы віцэ-спікер Савета Рэспублікі Марыяна Шчоткіна.
Злева дом Марыяны Шчоткінай.
Чытайце. Ад Абельскай да Ярмошынай: 113 уладальнікаў катэджаў у Драздах, поўны спіс
