У Светлагорску падчас тэст-драйву пакупнік скраў аўтамабіль. Аўто знайшлі ў Мінскай вобласці, паведамляе міліцыя.
У лютым 22-гадовы жыхар Чэрвеньскага раёна наткнуўся ў інтэрнэце на аб'яву аб продажы Mercedes-Benz W212. Па тэлефоне з прадаўцом ён дамовіўся пра сустрэчу ў Светлагорску.
Пакупнік прыехаў у райцэнтр увечары 25 лютага. Пасля агляду аўтамабіля зладзілі тэст-драйв. Істотных нараканняў на машыну не было, пасля невялікага торгу мужчыны дамовіліся пра здзелку.
Маладыя людзі заехалі на гарадскую АЗС, дзе гаспадар аўто адлучыўся. На вуліцы застаўся яго знаёмы і пакупнік. Апошні папрасіў дазволу сесці за руль нібыта для паўторнага тэст-драйву. Нічога не падазраючы, мужчына не адмовіў, а пакупнік скарыстаўся момантам і скраў аўтамабіль.
Пра здарэнне пацярпелы паведаміў у міліцыю. Сышчыкі высветлілі асобу падазраванага, аднак да таго моманту ён ужо знаходзіўся за межамі Гомельшчыны. Маладога чалавека затрымалі ў роднай вёсцы. Паводле яго слоў, адважыўся на злачынства ў надзеі на тое, што гаспадар не заявіць аб крадзяжы: Mercedes быў на расійскіх нумарах.
Цяпер падазраваны ў ізалятары часовага ўтрымання. Следчыя далі прававую ацэнку яго дзеянням. Завялі крымінальную справу.
