Аляксандр Лукашэнка сёння на нарадзе паўтарыў ранейшыя парады супраць COVID-19 — каранавірус нібыта можна «труціць» гарэлкай і лазняй.«Я некалі абмовіўся аб тым, што людзям трэба, каб змагацца з рознымі вірусамі, у тым ліку і з гэтым, часцей хадзіць у сухую лазню, — заявіў Аляксандар Лукашэнка. — Паколькі COVID-19 не любіць высокіх тэмпэратураў і пры плюс шасцідзесяці, як мяне праінфармавалі спецыялісты, гіне».
Доктар-рэаніматолаг Зміцер Салошкін растлумачыў Свабодзе, чаму нават самая гарачая саўна не лекуе ад COVID-19:
«Калі вы седзіце ў саўне, а чалавек кудысьці перад вамі кашлянуў на паліцу, тады так, калі там сухое паветра 100 градусаў, вірус загіне досыць хутка, — кажа ён. — Але тэмпература цела чалавека ўсярэдзіне гэта адна з самых жорсткіх канстантаў. І нават калі самая моцная хвароба, гэта 40 градусаў.
Нават калі вы седзіце ў саўне, тэмпэратура цела застаецца стабільнай. Так што чалавек-носьбіт гэтага вірусу, калі пасядзеў у саўне, выйдзе і зноў будзе кашляць і распаўсюджваць вірус.
Саўна за кошт тэмпературы можа хіба што «аўтаматычна» праводзіць дэзынфэкцыю, але ў целе чалавека нельга дасягнуць такой тэмпературы».
Лекар дадае: і іншыя «народныя сродкі», як часнык і цыбуля, не лічацца дзейнымі, а сапраўдныя рэкамендацыі супраць COVID-19 даступныя і даволі простыя.
Насамрэч, у Сусветнай арганізацыі здароўя няма даследаваньняў, якія б паказвалі, што вірус SARS-CoV-2 гіне пры тэмпературы ў 60 градусаў.
