Боснія і Герцагавіна ў сераду паведаміла пра найбольш рэзкі штодзённы рост колькасці новых выпадкаў каранавіруснай інфекцыі ў гэтым месяцы пасля таго, як у краіне пачалі аслабляць каранцін, піша Reuters.
Па афіцыйных даных, за папярэднія 24 гадзіны былі зарэгістраваныя 93 новыя выпадкі заражэння і дзве смерці, у параўнанні з 20 новымі выпадкамі днём раней і 49 выпадкамі ў панядзелак.
Агульная колькасць інфіцыраваных узрасла да 1677, памерлі 65 чалавек. У краіне зрабілі тэсты 29 130 чалавек.
У Рэспубліцы Сербскай у панядзелак пажылым людзям дазволілі выходзіць з дому на тры гадзіны кожны працоўны дзень.
У іншай аўтаномнай вобласці краіны, Федэрацыі Босніі і Герцагавіны, у пятніцу адмянілі начную каменданцкую гадзіну, а таксама дазволілі пажылым людзям і дзецям выходзіць з дому на некалькі гадзін раз у два дні.
Раней у Босніі дзейнічалі жорсткія абмежаванні для барацьбы з распаўсюджваннем каранавіруса, згодна з якімі пажылым людзям і дзецям наогул не дазвалялася пакідаць сваю кватэру.
