«Назавіце мне хоць адно палітычнае забойства ў Еўропе з 2000 года? Альбо знікненнне. У любой краіне Еўропы», — сказаў Віктар Бабарыка сёння на прэс-канферэнцыі ў Мінску, каментуючы магчымы пераслед і знікненне палітыкаў у Беларусі.
На яго думку, падобныя знікненні былі ў той час у Літве, Грузіі, Украіне.
«Пасля 2000 года ёсць у Беларусі факты нераскрытых злачынстваў? Я шчыра не веру, што Беларусь у 2020-м прадэманструе такія ж факты, якія былі да 2000 года», — сказаў ён.
Пракаментаваў Бабарыка і пераслед палітычных апанентаў, што адбыўся пасля выбараў 2006 і 2010 года.
«Я катэгарычны праціўнік такога. Калі людзі не правакуюць на такія дзеянні, не парушаюць закон, то такі пераслед — гэта кепска. Мы [наша ініцыятыўная група] не парушаем закон, не думаю, што будзе пераслед.
Я лічу, што ненармальна, калі за выказванне палітычнага пратэсту можна атрымаць дубінкай па спіне», — сказаў ён.





