Палітзьняволены, кансультант «Радыё Свабода», блогер Ігар Лосік абвясьціў сухую галадоўку ў чацьвер 11 сакавіка на знак пратэсту супраць новых абвінавачваньняў. Па якім арытыкуле яны прад’яўленыя, пакуль невядома. Адвакат Ігара Дзьмітры Лепрэтар знаходзіцца пад падпіскай аб неразгалошваньні і не можа расказваць пра гэта.
Раней Ігара ўжо абвінавачвалі ў падрыхтоўцы да парушэньня грамадзкага парадку і падрыхтоўцы да ўдзелу ў масавых беспарадках. Пасьля апошняга абвінавачваньня, выстаўленага ў сярэдзіне сьнежня, палітвязень трымаў галадоўку пратэсту, якая працягвалася 42 дні.
Акрамя абвяшчэньня новай галадоўкі Ігар Лосік на вачах у сьледчага і свайго адваката пашкодзіў сабе запясьці ў раёне венаў.
Жонка Ігара Дар’я Лосік расказала Свабодзе, што 15 сакавіка Ігар спыніў сухую галадоўку. Цяпер ён знаходзіцца ў карцары.
«За тое, што Ігар абвясьціў сухую галадоўку, яго зьмясьцілі ў карцар на пяць дзён, — расказала Дар’я. — Галадоўку Ігар трымаў чацьвёра сутак. Цяпер ён яшчэ ў карцары. Мы з адвакатам у бліжэйшыя дні зноў пастараемся трапіць у Жодзіна, даведацца пра стан Ігара больш».
У чацьвер 11 сакавіка Дар’я выступіла з адкрытым зваротам на адрас Аляксандра Лукашэнкі, у якім заклікала яго вызваліць яе мужа. Спыніць новую галадоўку Ігара Лосіка папрасіла Сьвятлана Ціханоўская.
