«Ён з праблемнай шмадзетнай сям’і. Выпівалі.
Але сам Уладзіслаў — вельмі парадачны чалавек. Ён сам карабкаўся па жыцці, але ніколі не піў, заўсёды добра працаваў. Адвучыўся ў ліцэі ў Пінску, але вярнуўся да нас, бо не было дапамогі і грошай, каб застацца ў горадзе, — расказвае Людміла Мельнік, намесніца па жывёлагадоўлі прадпрыемства «Моладава-Агра», дзе працаваў хлопец. — Працаваў у нас жывёлаводам: зімой даглядаў кароў, летам пасвіў.
Нічога кепскага не магу ўзгадаць пра яго. Заўсёды дапамагаў, заўсёды добра працаваў. Просты харошы хлопец».
У кастрычніку 2020 года Уладзіслаў ажаніўся. Сёлета 13 красавіка ў яго нарадзіўся сын Арсеній.
«Сына вельмі любіў. Я была на выпасе, пыталася: «Ну як, Улад, там твой сынок?» А ён як пра сына расказваў, то ўвесь аж свяціўся. Планаваў купіць дом тут, у Моладаве, як заробіць грошай. Але пакуль жыў у Бусе разам з бацькамі, дапамагаў ім. Казаў: «Не магу пакуль ад бацькоў з’ехаць, бо трэба маці дапамагаць», — узгадвае Людміла Мельнік. — Быў фактычна адзіным кармільцам: бацька ляжыць пасля інсульта, прыкуты да ложка. Сёстры жывуць асобна са сваімі сем’ямі».
Дзяцей адной са сваіх сясцёр Уладзіслаў і выратаваў коштам уласнага жыцця.
«Не скажаш, што там, дзе ўсё адбылося, небяспечна, але там не плаваюць. Але вось неяк знайшлося глыбокае нейкае месца… Уладзіслаў палез ратаваць тых дзяцей. Іх змог выштурхнуць, але сам не выратаваўся», — кажа Людміла Мельнік.
Пахаваюць хлопца 2 ліпеня ў яго роднай вёсцы.
