Сёння ў 11.25 на нумар 112 ад відавочцы паступіла паведамленне пра чалавека ў палонцы Сляпянскай воднай сістэмы ў Мінску. На месца выехалі падраздзяленні МНС.
65-гадовы мужчына выйшаў рыбачыць на акваторыі Сляпянскай воднай сістэмы. У нейкі момант ён праваліўся пад лёд. Яго заўважыў відавочца, які гуляў з сабакам на іншым беразе вадаёма. Ён пабег ратаваць чалавека і папрасіў іншых грамадзян патэлефанаваць у МНС.
Відавочца выцягнуў рыбака з палонкі на бераг і перадаў ратавальнікам. Пасля агляду медыкамі выратаваны адмовіўся ад шпіталізацыі.
