Фота: predsjednik.hr
Адказваючы на пытанне харвацкага выдання «Dzennik», як Харватыя адрэагуе на сітуацыю ва Украіне, прэзідэнт Харватыі заявіў:
«Мы не будзем мець з гэтым нічога агульнага і не павінны нічога. Калі будзе эскалацыя, то выведзем [з рэгіёна] апошняга харвацкага салдата».
Акрамя таго, Мілановіч зрабіў некалькі скандальных заяў адносна Украіны, згадаўшы карупцыю, падзеі Рэвалюцыі Годнасці і імкненне Украіны ўступіць у НАТА і ЕС.
«Украіне не месца ў NATO. Калі Украіна змяніла ўладу, тады гэта рух, які не быў дэмакратычным, быў пераваротам, падчас якога былі забітыя 50 чалавек. Гісторыя была такая — Украіна ідзе на Захад, нічога не пытаючыся у Расіі, у ЕС яе чакаюць малочныя рэкі — кісельныя берагі. Украіна да гэтага часу застаецца адной з самых карумпаваных краін, ЕС Украіне нічога не даў»,
— сказаў харвацкі прэзідэнт.
Міланавіч прызнаўся, што будзе ўсімі сіламі перашкаджаць любому прыцягванню Харватыі да канфлікту паміж Расіяй і Украінай.
«Пленкавіч [прэм'ер-міністр Харватыі Андрэй Пленкавіч, прыязны Украіны] можа пагражаць, колькі захоча. Харватыя павінна бегчы ад гэтага, як ад пажару. Харватыя не будзе пажарнікам ва ўсім гэтым»,
— заявіў Міланавіч.
Пасля гэтага выказвання Міланавіча аператыўна ўнеслі ў базу «Міратворац», куды запісваюць адкрытых ворагаў Украіны. На думку аўтараў публікацыі, прэзідэнт Харватыі распаўсюджвае крамлёўскую прапаганду і апраўдвае расійскую агрэсію.
А ва ўкраінскім МЗС заявілі, што патрабуюць публічнага абвяржэння абразлівых заяў прэзідэнта Харватыі. Адзначана, што сцвярджэнні Мілановіча аб падзеях Рэвалюцыі Годнасці абражаюць памяць украінцаў і замежнікаў, якія аддалі свае жыцці дзеля еўрапейскай будучыні Украіны.
«Харвацкі прэзідэнт прадэманстраваў сваё грэблівае стаўленне і няўдзячнасць за дапамогу, якую Украіна і ўкраінцы аказвалі Харватыі падчас яе барацьбы за незалежнасць, а таксама ў барацьбе з разбуральнымі пажарамі ў мінулым годзе. Але мы ўпэўненыя, што гэтая няўдзячнасць з'яўляецца яго асабістай рысай і не распаўсюджваецца на харвацкі народ, з якім нас аб'ядноўвае сяброўства і ўзаемная павага»,
— сказана ў каментары МЗС Украіны.
Зоран Міланавіч — палітык левай палітычнай арыентацыі, ён лідар Сацыял-дэмакратычнай партыі Харватыі. Згаданы ж ім прэм'ер Андрэй Пленкавіч — прадстаўнік кансерватыўнай Харвацкай дэмакратычнай супольнасці.
Андрэй Пленкавіч неадкладна адрэагаваў на заяву прэзідэнта. «Наколькі мне вядома, харвацкіх вайскоўцаў ва Украіне няма», — сказаў прэм’ер журналістам і дадаў, што кантынгент харвацкага войска, які быў у Польшчы, гэтымі днямі якраз вярнуўся.
«У першую хвіліну я падумаў, што гэта кажа нейкі расійскі службовец, — каментаваў Пленкавіч заяву Міланавіча, з якой той выступіў падчас наведвання кандытарскай фабрыкі. — Напэўна, так паўздзейнічаў цукар, яму там далі нейкія цукеркі».
