Міхаіл Падаляк. Фота: president.gov.ua
«Расійскія войскі, якія атакавалі Украіну, узялі аператыўную паўзу і ажыццяўляюць перагрупоўку сіл, але пазіцыйныя баі працягваюцца практычна па ўсёй краіне паблізу мяжы з Расійскай Федэрацыяй і Беларуссю», — пра гэта заявіў дарадца кіраўніка Офіса прэзідэнта Міхаіл Падаляк на брыфінгу.
Паводле яго слоў, жорсткія баі працягваюцца на поўдні Украіны.
«Пад ударам знаходзяцца Генічаск, Скадоўск, Новая Кахоўка. Вельмі шмат фота- і відэафіксацыі разбурэнняў, якія наносяць расійскія ўзброеныя сілы ўжо нават цывільнай інфраструктуры», — сказаў Міхаіл Падаляк.
Ён адзначыў, што жорсткія баі таксама ідуць на Данецкім і Луганскім кірунках, і ўзброеныя сілы Украіны былі гатовыя да такога развіцця падзей. «Украінскія абаронцы вельмі актыўна аказваюць супраціў і нават адкідваюць суперніка на некаторую адлегласць ад межаў».
Дарадца Офіса кіраўніка дзяржавы адзначыў, што Украіна па-ранейшаму кантралюе пастаўкі прадуктаў харчавання і інфраструктуру, якая забяспечвае паўсядзённае жыццё людзей.
Міхаіл Падаляк адзначыў, што на поўдні і ўсходзе Украіны расійскія ўзброеныя сілы атакуюць не толькі вайсковую інфраструктуру, але і пачалі наносіць удары па цывільных аб'ектах.
«У Вуглядары пад абстрэл рэактыўнымі залпавымі сістэмамі трапіла бальніца. Гэтак жа «градамі» атакуюць мікрараёны Марыупаля», — адзначыў дарадца кіраўніка Офіса прэзідэнта.
Акрамя таго, паводле яго слоў, з тэрыторыі Беларусі не толькі зайшлі сухапутныя войскі агрэсара, але і былі ажыццёўленыя ўдары чатырма балістычнымі ракетамі па тэрыторыі Украіны. «Гэта юрыдычныя доказы Вялікай вайны, якую развязала РФ супраць Украіны з дапамогай Беларусі, і яны павінны быць зафіксаваныя», — падкрэсліў Міхаіл Падаляк.
«Ёсць таксама аператыўныя звесткі, што некалькі груповак Расійскай Федэрацыі хацелі здзейсніць тэрарыстычны акт на Чарнобыльскай АЭС і выклікаць магутную экалагічную катастрофу. Гэта істотна мяняе карціну таго, што адбываецца ва Украіне. Зразумела, што РФ не проста хоча зрынуць ўрад ці замяніць яго на марыянетачных выканаўцаў — яна хоча пацягнуць максімальныя разбурэнні ва Украіне. Нават экалагічнага характару», — адзначыў дарадца кіраўніка Офіса прэзідэнта Украіны.