Значная частка дзяцей, якія пачынаюць навучанне ў школе ў шэсць гадоў, не гатовы да яе з прычыны недастатковага псіхалагічнага развіцця.
Пра гэта паведаміў галоўны доктар Гарадскога клінічнага дзіцячага псіханеўралагічнага дыспансера, галоўны пазаштатны дзіцячы псіхіятр Мінска і Беларусі Вадзім Кірылюк 12 лютага падчас сустрэчы з журналістамі перад пачаткам рэспубліканскай навукова‑практычнай канферэнцыі «Актуальныя пытанні дыягностыкі, лячэння і рэабілітацыі захворванняў нервовай сістэмы ў дзяцей».
Спецыяліст сказаў, што гэтай вясной у Мінску ў трэці раз пройдзе агульнагарадская акцыя «Ці гатова ваша дзіця да школы?» і заклікаў удзельнічаць у ёй дзяцей, якія пойдуць у школу гэтым годам. Бацькі змогуць атрымаць кансультацыі псіхолагаў і псіхатэрапеўтаў Гарадскога клінічнага дзіцячага псіханеўралагічнага дыспансера і дзіцячых паліклінік горада наконт гатоўнасці іх дзяцей да школы.
У 2009 годзе падчас акцыі да спецыялістаў звярнулася больш за паўтары тысячы чалавек.
Пры гэтым па псіхалагічных паказчыках аказаліся не гатовымі ісці ў школу 52% дзяцей, у 2008 годзе — 56%.
Кірылюк падкрэсліў, што псіхалагічная гатоўнасць да школы не звязана з уменнем дзіцяці чытаць і лічыць, а вызначаецца ўзроўнем псіхічнага развіцця для засваення школьнай праграмы і здольнасцю вучыцца ў калектыве аднагодкаў.
Галоўны ўрач выказаў меркаванне, што празмерныя разумовыя і фізічныя нагрузкі ў дашкольным і школьным узросце негатыўна ўплываюць на здароўе дзіцяці. Не варта перагружаць дзіця, аддаючы яго «ледзь ці не з трох гадоў у некалькі гурткоў, у тым ліку англійскай мовы». Дзіця не трэба прыспешваць з развіццём, а неабходна падыходзіць да працэсу разумна, адзначыў спецыяліст.
