Так пракаментаваў БелаПАН прынятую напярэдадні рэзалюцыю прэс‑сакратар МЗС Беларусі Андрэй Савіных.
«Першае азнаямленне з тэкстам пакідае адчуванне, што гэты дакумент быў прыняты імпульсіўна, пад уплывам выпадковых фактараў ці ваганняў палітычнай кан’юнктуры. ПАРЕ гаворыць аб сваёй прыхільнасці да дыялогу з Беларуссю і тут жа прымае рашэнне прыпыніць усе кантакты», — заўважыў прэс‑сакратар.
У гэтай сітуацыі, падкрэсліў Савіных, пазіцыя беларускага боку выглядае больш паслядоўнай:
«Мы разглядаем дыялог як сродак вырашэння ўсіх існуючых пытанняў, дасягнення паразумення і разлічваем, што нашы партнёры таксама прыйдуць да такога вываду».
Нагадаем, 29 красавіка ПАРЕ прыняла рэзалюцыю, якая прадугледжвае прыпыненне кантактаў з Беларуссю на высокім узроўні. У галасаванні ўзялі ўдзел 67 дэпутатаў, 58 з іх прагаласавалі за прыняцце рэзалюцыі, шэсць — супраць, трое ўстрымаліся (усяго ў ПАРЕ 318 дэпутатаў).
У рэзалюцыі ўказана на «недастатковы прагрэс» Беларусі ў галіне адпаведнасці стандартам Рады Еўропы. У прыватнасці, гаворыцца ў дакуменце, у рэспубліцы «ў атмасферы сакрэтнасці» былі прыведзены ў выкананне два смяротныя прыгаворы, калі скаргі асуджаных разглядаў Камітэт ААН па правах чалавека. Адзначаюцца таксама выпадкі парушэння ў Беларусі правоў польскай нацыянальнай меншасці і адсутнасць міжнародных назіральнікаў на выбарах у мясцовыя саветы.
У дакуменце выказваецца шкадаванне ў сувязі з «недастатковай палітычнай воляй беларускіх улад раздзяліць каштоўнасці Рады Еўропы». Пры гэтым у рэзалюцыі ўтрымліваецца заклік прадоўжыць дыялог з Беларуссю.
Беларусь — адзіная краіна ў Еўропе, у якой дагэтуль прымяняецца смяротная кара. У чэрвені 2009 года Парламенцкая асамблея Рады Еўропы прыняла рэзалюцыю аб вяртанні парламенту Беларусі статусу спецыяльнага запрошанага ў асамблеі пры ўмове ўвядзення ў краіне мараторыя на смяротную кару. Да ўвядзення мараторыя таксама заклікае Еўрасаюз. Гэта — адна з умоў адмены візавых санкцый у дачыненні да беларускіх чыноўнікаў, якія ЕС прадоўжыў да кастрычніка 2010 года.
