Захаваць паэтаў для гісторыі вырашылі ў беларускім сеціве. Раз на тыдзень на сайтах «Будзьма беларусамі!» і «Літрадыё» у рамках відэапраекту «Чорна-белыя вершы» паказваюць аднаго паэта, які на ўласны выбар чытае адзін верш.
Віктар Жыбуль чытае верш «Сенегал»
— Ідэя — зрабіць зрэз сучаснай паэзіі без мадэравання, тэматычных і лексічных абмежаванняў, — кажа прадусар праекта, пісьменнік і журналіст Павал Анціпаў. — Чаму ў чорна-белым фармаце? Мы хочам, каб нашыя ролікі ўехалі ў літаратурнае жыццё як у жыццё чалавека ўвайшлі кароткія стужкі братоў Люм'ер.
Сярод першых удзельнікаў праекту — Андрэй Адамовіч, Наста Манцэвіч, Віталь Рыжкоў, Антон Рудак, Ася Волкава. Папярэднюю згоду на ўдзел у праекце далі Уладзімір Арлоў, Андрэй Хадановіч, Джэці, Югася Каляда, Леанід Дранько-Майсюк, а таксама расійскамоўныя паэты Кацярына Зыкава і Дзмітры Строцаў. З многімі паэтамі вядуцца перамовы. Арганізатары праекта кажуць, што хацелі б бачыць сярод удзельнікаў праекта таксама і жывых класікаў: Алеся Разанава і Рыгора Барадуліна.
— Знялі мой студыйны выступ з двух дубляў — слова няправільна сказаў, — дзеліцца ўражаннямі ад здымкаў першы ўдзельнік праекту «Чорна-белыя вершы» паэт Віктар Жыбуль. — Падчас чытання ў камеру крыху бянтэжыла малая прастора і адсутнасць публікі, але папрацаваць у жанры камернага відэа было як мінімум цікава.
Дарэчы, імёны ўлюблёных паэтаў, якіх вы жадалі б бачыць у «Чорна-белых вершах», дасылайце на адрас [email protected] з пазнакай «вершы».
