Такі змест мела заява, якую зрабіў міністр замежных спраў Аўстрыі Міхаэль Шпіндэлегер падчас сустрэчы з намесьікам кіраўніка замежнапалітычнага ведамства Беларусі Валерыем Варанецкім у Вене.
«Мы заклікаем беларускае кіраўніцтва да стварэння спрыяльных умоў напярэдадні правядзення ў снежні свабодных і справядлівых, у адпаведнасці са стандартамі АБСЕ, прэзідэнцкіх выбараў», — адзначыў Шпіндэлегер, прымаючы Варанецкага і іншых адказных асобаў з МЗС Беларусі.
Абмяркоўваючы пытанні супрацоўніцтва Беларусі з ЕС і Аўстрыяй, Шпіндэлегер падкрэсліў:
«Аўстрыя і ЕС віталі б больш цеснае супрацоўніцтва з Беларуссю, і Мінск мусіць быць гатовым для гэтага. Асабліва гэта тычыцца дэмакратыі і правоў чалавека. У гэтай сувязі ЕС будзе дакладна назіраць за прэзідэнцкімі выбарамі ў снежні».
Кіраўнік аўстрыйскага МЗС таксама падкрэсліў, што ні ў ЕС, ні ў Аўстрыі «няма цікавасці ізаляваць Беларусь».
Паводле яго словаў, для таго, каб ажыццяўляць добрасуседскую еўрапейскую палітыку на доўгатэрміновай аснове, партнёрам трэба кіравацца асноўнымі агульнаеўрапейскімі каштоўнасцямі ды стандартамі.
