У Магілёве на мосце цераз Дняпро адбылося буйное ДТЗ

Як паведамілі ў ДАІ вобласці, адразу пяць аўтамабіляў сутыкнуліся раніцай 22 кастрычніка на мосце імя Каралёва праз Дняпро.

Паводле папярэдняй версіі, першым, не справіўшыся з кіраваннем на абледзянелай дарозе, уехаў у парапет моста кіроўца легкавога аўтамабіля «Форд». Затым адзін за другім на вялікай хуткасці сутыкнуліся яшчэ тры аўтамашыны.

Апошнім удзельнікам дарожна-транспартнага здарэння стаў аўтапоезд МАN, які, ударыўся аб машыны, якія раптоўна спыніліся, і ўрэзаўся ў парапет моста.

«На шчасце, ахвяр і пацярпелых няма», — паведаміла інспектар ДАІ Вольга Вяршубская.

Рух з-за ДТЗ цалкам не перакрываўся, аднак у выніку сутыкнення на мосце ўтварыўся велізарны затор, які даходзіў у пэўныя моманты да двух кіламетраў.

Уладзімір Лапцэвіч, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ