БАТЭ выбыў з Кубка Беларусі па футболе 2

Уладальнік Кубка Беларусі — 2010 барысаўскі БАТЭ прайграў 27 лістапада на сваім полі ў 1/8 фіналу брэсцкаму «Дынама» — 0:1.

Берасцейцаў, між іншым, узначальвае былы галоўны трэнер БАТЭ Юры Пунтус,

Адзіны мяч у сустрэчы забіў на 17-й хвіліне Мікалай Януш.

БАТЭ гуляў у наступным складзе: Гутар, Юрэвіч, Шытаў (Аляхновіч, 86), Радзькоў, Бардачоў, Ліхтаровіч, Бага, Брэсан (Валадзько, 46), Няхайчык, Скавыш (Паўлаў, 53), Радзівонаў.

"Каманда яшчэ знаходзіцца ў кавярні, адзначаючы пераможны сезон. Каманда ўсё яшчэ вяртаецца з Бабруйска [дзе БАТЭ два тыдні таму аформіла чэмпіёнства -- НН]", - сказаў на пасляматчавай прэс-канферэнцыі галоўны трэнер БАТЭ Віктар Ганчарэнка.

Таксама Ганчарэнка сказаў, што асноўнаму галкіперу БАТЭ Сяргею Верамко давядзецца перанесці аперацыю на локці, і два пазасталыя матчы ў Лізе Еўропы ў браме будзе стаяць Гутар.

***

Большасць матчаў 1/8 фіналу Кубка Беларусі прайшлі ў верасні, адзін — у кастрычніку.

Пуцёўкі ў вясновы чвэрцьфінал заваявалі: сталічныя «Партызан» і «Мінск», «Гомель», «Нафтан», «Белшына», «Нёман», «Шахцёр». «Партызан», дарэчы, выбыў у першую лігу, а «Гомель» наадварот вярнуўся ў вышэйшую лігу.

Надзвычайнага ў сённяшняй паразе БАТЭ няма.

Ад выніку сённяшняга матча, хутчэй, згубіла мінскае «Дынама».

Нагадаем, што мінчукі фінішавалі ў сезоне-2010 на 4-м месцы, г.зн. па-за еўракубкамі. І цяпер, каб наступным летам выступіць у кваліфікацыйнай стадыі Лігі Еўропы, экс-флагману беларускага футболу неабходна, каб Кубак выйгралі або «Шахцёр», або «Мінск».

***

2 снежня ў Мінску БАТЭ згуляе з кіеўскім «Дынама» ў матчы групавога турніру Лігі Еўропы. Пачатак гульні — 22:05.

БАТЭ датэрмінова заваяваў пуцёўку ў 1/16 фіналу Лігі Еўропы, але ў выпадку перамогі над «Дынама» зойме 1-е месца ў групе, што дае выгоды пры лёсаванні плей-оф. Матчы 1/16-й пройдуць 17 і 24 лютага 2011 года.

Кіеўскае «Дынама» сёння, 27 лістапада, выйграла ў 19-м туры чэмпіянату Украіны на сваім полі ў «Севастопаля» — 2:0.

На аднаму мячу забілі гулец зборнай Фінляндыі Раман Яроменка і харват Огнен Вукоевіч. «Дынама» на 10 балаў адстае ад лідара чэмпіянату данецкага «Шахцёра», які свой матч правядзе заўтра. Потым чэмпіянат Украіны бярэ паўзу да сакавіка.

АГ

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ