Але на замову лукашэнкаўскага АНТ.

Кампанія «TNS ва Украіне» мае правесці свой экзіт-пол на выбарах у Беларусі. Пра гэта паведамілі ў Цэнтрвыбаркаме краіны.

Са словаў Ярмошынай, «TNS ва Ўкраіне» атрымала акрэдытацыю ў камісіі пры Акадэміі навук.

«Мы накіравалі ў абласныя камісіі ліст, каб ім не рабілі перашкодаў, — заявіла Ярмошына.
 — Каб абласныя камісіі давялі да ўчастковых, што такія арганізацыі будуць стаяць на выхадзе. Яны, адзінае, не павінны перашкаджаць выбарцам. Яны, да прыкладу, не павінны знаходзіцца ў памяшканні ўчастка».
Вынікі апытанняў можна будзе апублікаваць толькі пасля выбараў, заявіла Ярмошына, іначай «гэта лічыцца ўплывам на выяўленне волі выбарцаў».

Дарэчы, на мінулых выбараў лукашэнкаўскі «Экаом» абвяшчаў вынікі свайго «экзіт-полу» на працягу дня праз усе дзяржаўныя каналы.

Доктар навук Мікалай Чурылаў, генеральны дырэктар «TNS ва Украіне», якая існуе на рынку 22 гады, паведаміў, што ягоная кампанія будзе праводзіць не толькі экзіт-пол, але і шэраг папярэдніх даследаванняў на замову Другога беларускага тэлеканала.

Такі экзіт-пол кампанія праводзіць упершыню за межамі Ўкраіны. Цяпер яна рыхтуе 950 інтэрв’юераў у Беларусі, найперш студэнтаў, каб ахапіць 300 выбарчых участкаў. Спадар Чурылаў адзначыў, што акрэдытацыя атрымана пасля прадстаўлення дакументаў старонак на дзвесце.

Аднак

кіраўнік «TNS ва Украіне» наперад засцерагае, што вынікі экзіт-полу могуць не супасці з афіцыйнымі вынікамі выбараў. Ён тлумачыць гэта беларускай практыкай «датэрміновага галасавання»:
«Мы кваліфікавана працуем менавіта ў дзень выбараў, але людзі яшчэ галасуюць і дома. Мы наўрад ці зможам трымаць упэўнена руку на пульсе, як гэта робім ва Украіне, бо ў нас [ва Украіне] няма такога паняцця, як датэрміновае галасаванне».

Як вядома, «Экаом», якому апазіцыя не давярае, ізноў мае намер рабіць і сваё апытанне.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?