Звычайна ў гэтыя дні Старшыня Рады БНР зьвяртаецца да беларусаў з калядным віншаваньнем. Аднак гэтым разам сьвята азмрочана нядаўнімі падзеямі, таму і ліст Івонкі Сурвілы мае іншы характар.
«Дарагія суродзічы на Бацькаўшчыне і ў Замежжы,
апошнімі днямі, у гэты сьвяточны час Божага Нараджэньня беларускі народ перажыў яшчэ адну балючую бачынку сваёй гісторыі: здраду, зьдзек і зьнявагу па віне чалавека, які называе сябе ягоным выбраным прэзыдэнтам.
Ад імя Рады Беларускай Народнай Рэспублікі хачу выказаць глыбокае спачуваньне ўсім ахвярам нянавісьці, якая раз’юшылася на вуліцах Менску ў нядзелю 19 сьнежня 2010 году. Хачу запэўніць вас, што мы — з вамі, і што не дазволім сьвету забыцца пра вас аж пакуль ня будзе вызвалены апошні палітвязень.
Заклікаем кожнага беларуса запомніць жудасныя падзеі 19 і 20 сьнежня — той атручаны калядны падарунак, якія падрыхтавалі вам людзі, што хочуць вамі кіраваць.
Яднайцеся, дарагія суродзічы. Ня бойцеся бараніць братоў і сёстраў у бядзе! Надыйшоў час выказаць удзячнасьць тым, хто да апошняга змагаўся за вас.
Салідарнымі, з’яднанымі, з Божай дапамогай, мы зробім нашую краіну шчасьлівай і заможнай. Будучыня за намі!
Жыве Беларусь і будзе жыць!»
