Еўрарадыё паскардзілася ў КДБ на яго супрацоўнікаў

«Еўрапейскае радыё для Беларусі» накіравала ў Камітэт дзяржбяспекі скаргу на дзеянні супрацоўнікаў упраўлення КДБ па Мінску і Мінскай вобласці,

якія праводзілі 25 снежня ператрус у памяшканні мінскага карпункта радыё і вынеслі практычна ўсё абсталяванне.

Як паведаміла шэф-рэдактар «Еўрарадыё» Юлія Слуцкая, копія ліста адпраўлена ў Генеральную пракуратуру. У ім зазначаецца, што пры правядзенні следчых дзеянняў быў парушаны шэраг заканадаўчых норм, а таксама ўтрымліваецца просьба разабрацца ў сітуацыі і вярнуць тэхніку.

З рэдакцыі, паводле слоў Слуцкай, вынеслі камп`ютары, ноўтбукі, сервер, дыктафоны, фотаапараты, партатыўныя відэакамеры — усяго 43 найменні.

Шэф-рэдактар падкрэсліла, што дагэтуль супрацоўнікам «Еўрарадыё» не растлумачылі, у сувязі з чым праводзіўся вобыск. Яна таксама нагадала, што падчас вобыску ў офісе нікога не было.

Слуцкая звярнула ўвагу на тое, што «Еўрарадыё» мае акрэдытацыю МЗС Беларусі, якая сапраўдная да 10 лістапада 2011 года. Карпункт у Мінску быў адкрыты ў лістападзе 2009-га.

Алена Спасюк, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ