Выстава унікальных архіўных дакументаў, якія адносяцца да перыяду Беларускай Народнай Рэспублікі (БНР), адкрылася 23 сакавіка ў Цэнтральным дзяржаўным архіве Літвы і ЕГУ. Мерапрыемства праходзіць у рамках Беларускага тыдня, прысвечанага святкаванню Дня Волі ў Вільні.

Як паведамілі БелаПАН у прэс-службе маладзёжнай асацыяцыі StudAlliance, у экспазіцыі прадстаўлены копіі розных зваротаў, рэзалюцый, асабістых дакументаў заснавальнікаў палітычных аб'яднанняў, дакументаў аб беларускім музеі Івана Луцкевіча, дыпламатычных пашпартоў беларускіх палітыкаў, унікальныя звесткі аб дзейнасці Барыса Кіта.

Выстава адкрылі куратары бакалаўрскай праграмы ЕГУ «Культурная спадчына і турызм» Юрый Юркевіч і прарэктар па акадэмічных пытаннях Аляксандр Калбаска. Мастацкім афармленнем выставы займаўся Алесь Пушкін. У пачатку мерапрыемства было зачытанае вітальнае слова старшыні Рады БНР Івонкі Сурвілы.

Прадстаўнікі ЕГУ пры падтрымцы супрацоўнікаў Цэнтральнага архіва шукалі і аналізавалі гістарычныя дакументы, якія маюць значэнне для беларускай гісторыі 1918-1944 гадоў.

У прэс-службе асацыяцыі адзначылі, што наведвальнікі выставы з цікавасцю слухалі аповяд пра дакументы, размешчаныя на выставе, бацькі беларускай незалежнасці Антона Луцкевіча ў выкананні артыста Пятра Клюева, які звярнуўся да гасцей на беларускай, англійскай, польскай і італьянскай мовах. «Прэм'ер-міністр» уласнаручна падпісаў «пашпарты БНР» з асабістым нумарам для кожнага, хто хацеў стаць яе грамадзянінам.

Арганізатарамі выставы выступілі Еўрапейскі гуманітарны універсітэт (ЕГУ), Цэнтральны дзяржаўны архіў Літвы і Фонд імя Конрада Адэнаўэра (KAS).

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?