Традыцыйна напачатку месяца прапануем вашай увазе дзясятку найбольш цікавых, на наш погляд, музычных навінак. Вельмі прыемна, што зноў не абышлося без беларускіх гуртоў.
Seeed — Bam Bam
Seeed — адзін з найбольш вядомых і паважаных музычных калектываў Германіі.
Стыль гурта вызначыць адназначна складана — гэта нешта паміж рэгі, хіп-хопам і дабам. Адметнасць Seeed у тым, што ў склад калектыву ўваходзіць адразу 11 чалавек: 2 салісты, ды-джэй і вялікая інструментальная каманда.
Bam Bam — шосты альбом у дыскаграфіі гурта, які прыхільнікі чакалі доўгія сем год.
Nick Cave & The Bad Seeds — Ghosteen
Двайны альбом Ghosteen закрывае своеасаблівую музычную «трылогію», распачатую двума папярэднімі альбомамі гурта, Push the Sky Away і Skeleton Tree.
Галоўнымі лірычнымі тэмамі альбома, па словах Кейва, з'яўляюцца «каханне, пачуццё страты і здольнасць адпускаць».
Варта нагадаць, што падчас запісу папярэдняга альбома загінуў 15-гадовы сын Ніка Кэйва. У Ghosteen Кейв шукае і, здаецца, знаходзіць у сабе жаданне і сілы неяк рухацца кудысьці далей.
Portico Quartet — Memory Streams
Portico Quartet — гэта чацвёра брытанскіх музыкаў, якія ў сваёй творчасці спалучаюць джаз з электроннай музыкай.
Атрымліваецца з гэтага вельмі смачны і прыгожы кактэйль, а новы альбом крытыкі лічаць найлепшым за апошнія 10 гадоў.
Relikt — Дрэва жыцця
З выхадам новага альбома гурт Relikt правёў невялічкі рэбрэндынг: для спрашчэння пошуку і ўспрымання ў назве адзінка памянялася на літару «L».
Але на гэтым са зменамі скончана. У музычным плане гэта ўсё тыя ж народныя песні, выкананыя ў фірмовым пазнавальным «рэліктавым» стылі. Што вельмі добра.
Mando Diao — BANG
Шведскі гурт за 20 гадоў свайго існавання, здаецца, да дасканаласці давёў свой гук і стыль. Яны — пазнавальныя, і гэта іх як плюс, так і мінус.
Тыя, хто чакаў нечага новага, кажуць пра тое, што альбом даволі сярэдненькі. Аматараў жа стылю BANG задаволіў, але ўсе сходзяцца на думцы, што гэта далёка не найлепшая работа ў дыскаграфіі шведаў.
FOALS — Everything Not Saved Will Be Lost: Part 2
У сакавіку першая частка альбома брытанскага гурта FOALS усталявала надзвычайна высокую музычную планку. І другая частка, відавочна, не расчаравала прыхільнікаў — гэта заяўкі на званне найлепшых альбомаў у сваім музычным жанры.
Калі першая частка была больш меладычнай і нью-вэйвавай, то другую FOALS імкнуліся зрабіць больш рокавай і эксперыментальнай.
Shuma — Me, Mother
У сваім новым альбоме Shuma сабрала старажытныя беларускія песні, якія выкарыстоўваліся жанчынамі ў розных рытуалах, і захавала ўсе моўныя дыялекты.
«Me, Mother» — гукавая містэрыя, прысвечаная калектывам нашай Маці Зямлі, а таксама сваім бацькам і дзецям.
Stereophonics — Kind
Свой адзінаццаты альбом валійцы запісалі ў бровары Ramsbury Brewery & Distillery ў англійскім горадзе Марлбара, графства Уілтшыр, усяго за 11 летніх дзён.
Cigarettes After Sex — Cry
Франтмэн гурта Грэг Гансалес раней прызнаўся, што бачыць другі альбом гурта як фільм, — а крытыкі адзначаюць кінематаграфічнасць і адначасова медытатыўнасць плыткі.
Kanye West — Jesus Is King
Некалі Канье хацеў кінуць чытаць рэп, бо гэта — музыка д'ябла. Але пастар змог пераканаць рэпера і накіраваць творчасць у станоўчую плынь. Рашэнне знайшлося ў выглядзе альбома на рэлігійную тэматыку.
Сёлета Канье Уэст заснаваў госпэл-гурт, які выконвае па нядзелях рэлігійныя песні і каверы на старыя трэкі Уэста. Там жа ўпершыню быў выкананы адзін з трэкаў альбома.
На Каляды Уэст абяцае яшчэ адзін рэлігійны альбом.
Нашы папярэднія агляды:
